Gujarat Man arrested for posing as ISRO scientist And Claiming built Chandrayaan 3 Module:

गुजरातमधील एका व्यक्तीने चांद्रयान-3 चंद्र मोहिमेसाठी लँडर मॉड्यूल डिझाइन केल्याचा दावा केला होता. तसेच तो भारतीय अंतराळ संशोधन संस्थेचा (ISRO) शास्त्रज्ञ म्हणून आपली ओळख सांगायचा.

या प्रकरणी एका व्यक्तीने पोलिसांकडे या व्यक्तीची वागणूक संशयास्पद असल्याची तक्रार केली होती. याचा पोलिसांनी तपास केला.

तपासामध्ये सर्व दावे खोटे असल्याचे निष्पन्न झाल्यानंतर पोलिसांनी त्याला गुजरातमधील सुरत शहरातून अटक केली. अटक केलेल्या व्यक्तीचे नाव मितुल त्रिवेदी असे आहे. सुरत शहर गुन्हे शाखेने आरोपींवर विविध कायद्यांंतर्गत गुन्हा दाखल केला आहे.

एका पोलीस अधिकाऱ्याने सांगितले की, सखोल चौकशीत असे दिसून आले की या व्यक्तीचा इस्रोच्या चांद्रयान-3 मोहिमेशी कोणत्याही प्रकारे संबंध नाही. तसेच तो इस्रोचा कर्मचारी असल्याचा दावाही खोटा आहे.

या प्रकरणी आरोपीवर विविध कलमांतर्गत गुन्हे दाखल केले असून, पुढील चौकशी सुरू आहे.

विद्यार्थ्यांना आकर्षित करण्यासाठी बनाव

अधिका-यांनी सांगितले की, आरोपी मितुल त्रिवेदी हा अंदाजे 30 वर्षांचा आहे आणि तो सुरत शहरातील तो चालवत असलेल्या कोचिंग क्लासेससाठी अधिकाधिक विद्यार्थ्यांना आकर्षित करण्यासाठी इस्रोचा शास्त्रज्ञ असल्याचे दाखवत असे. या व्यक्तीने इस्रोच्या पुढील प्रकल्पामध्ये सदस्य असल्याचे बनावट पत्रही तयार केले होते.

इस्त्रोने दावा नाकारला

अतिरिक्त पोलिस आयुक्त शरद सिंघल म्हणाले की, त्रिवेदी हे खाजगी शिक्षक आहे. तो आपल्या कोचिंग क्लासेसकडे अधिकाधिक विद्यार्थ्यांना आकर्षित करण्यासाठी माध्यमांसमोर इस्रोचे शास्त्रज्ञ असल्याचे सांगायचा. आम्ही इस्रोशी संपर्क साधला तेव्हा त्यांनी सांगितले की, आरोपीने दाखवलेले पत्र प्रथमदर्शनी त्यांनी दिलेले नाही.