टी-२० क्रिकेटचा वेग आणि रोमांच यासाठी जगभरात ओळख आहे. या स्वरूपात फलंदाज अवघ्या काही चेंडूत सामन्याचे चित्र पालटू शकतात. अशाच एका जबरदस्त कामगिरीने महाराष्ट्राच्या किरण नवगिरेने महिला क्रिकेटच्या इतिहासात आपले नाव सुवर्णाक्षरांनी कोरले आहे. वरिष्ठ महिला टी-२० ट्रॉफी स्पर्धेत पंजाबविरुद्ध झालेल्या सामन्यात नवगिरेने केवळ ३५ चेंडूत १०६ धावांची विस्मयकारक खेळी करत विक्रमी शतक झळकावले आणि महाराष्ट्राला ९ विकेट्सने भक्कम विजय मिळवून दिला.

किरण नवगिरेची विक्रमी खेळी

महाराष्ट्राकडून सलामीसाठी मैदानात उतरलेल्या किरण नवगिरेने सुरुवातीपासूनच आक्रमक पद्धतीने फलंदाजी सुरू केली. तिने पंजाबच्या गोलंदाजांवर अक्षरशः हल्ला चढवत केवळ ३४ चेंडूत आपले शतक पूर्ण केले.

हे महिला टी-२० क्रिकेटच्या इतिहासातील सर्वात जलद शतक आहे. तिच्या या खेळीत १४ चौकार आणि ७ षटकारांचा समावेश होता. नवगिरेचा स्ट्राईक रेट तब्बल ३०२.८६ इतका होता. महिला टी-२० सामन्यात ३०० पेक्षा जास्त स्ट्राईक रेटसह शतक झळकावणारी ती पहिलीच फलंदाज ठरली आहे.

या खेळीद्वारे नवगिरेने न्यूझीलंडच्या सोफी डेव्हाईनचा विक्रम मोडला. २०२१ मध्ये डेव्हाईनने वेलिंग्टनकडून ओटागोविरुद्ध ३८ चेंडूत नाबाद १०८ धावा केल्या होत्या. परंतु आता हा विक्रम किरण नवगिरेच्या नावावर गेला आहे.

पंजाब महिला संघाने प्रथम फलंदाजी करताना २० षटकांत ११० धावा केल्या. पंजाबकडून प्रिया कुमारीने सर्वाधिक ३०, प्रगती सिंगने १८, आणि अक्षित भगतने १६ धावा केल्या. महाराष्ट्राकडून ए.ए. पाटील आणि बी.एम. मिरजकर यांनी प्रत्येकी दोन, तर ध्यानेश्वरी पाटीलने एक विकेट घेतली.

लक्ष्याचा पाठलाग करताना महाराष्ट्राचा डाव जवळजवळ एकहाती किरण नवगिरेनेच जिंकून दिला. तिने १०६ धावा झळकावत सामना एका बाजूने संपवला. तिच्या साथीला एम.आर. मागरेने १० चेंडूत ६ धावा, तर ईश्वरी सावकरने १ धावा केल्या. नवगिरेच्या आक्रमक खेळीसमोर पंजाबच्या गोलंदाजांना कोणतेच उत्तर देता आले नाही आणि महाराष्ट्राने ९ विकेट्सने शानदार विजय मिळवला.

किरण नवगिरेच्या या ऐतिहासिक शतकामुळे ती आता भारतीय महिला क्रिकेटमधील नवीन "सुपरस्टार" म्हणून चर्चेत आली आहे. या विक्रमाने तिच्या कारकिर्दीला एक नवा आयाम मिळाला असून, ती लवकरच राष्ट्रीय संघात आपली दावेदारी सिद्ध करण्याची शक्यता व्यक्त केली जात आहे.