Mahadev Betting App: महादेव बेटिंग ॲप प्रमोटर्सकडून छत्तीसगडचे मुख्यमंत्री भूपेश बघेल यांना आत्तापर्यंत तब्बल 508 कोटी रुपये दिले असल्याचा खळबळजनक आरोप अंमलबजावणी संचालनालयाच्या वतीने करण्यात आला आहे. पीटीआय या वृत्तसंस्थेच्या याबाबत माहिती दिली आहे. याप्रकरणी अधिक तपास सुरु असल्याची माहिती समोर आली आहे.

महादेव बेटिंग ॲप गेल्या काही दिवसांपासून वादात सापडले आहे. बेकायदा सट्टेबाजीच्या माध्यमातून 5,000 कोटींचा घोटाळा झाल्याची चर्चा आहे.

महादेव बेटिंग ॲप कंपनीवर बेकायदेशीर बेटिंग वेबसाइट्सना नवीन युझर्स पुरवणे, बेनामी बँक खाती चालवणे, निधीचा गैरवापर करणे आणि हवाला व्यवसाय चालवणे असे आरोप आहेत.

या मनी लाँड्रिंग प्रकरणाचा तपास करत असलेल्या अंमलबजावणी संचालनालयाने आत्तापर्यंत अभिनेता रणबीर कपूर, हुमा कुरेशी, हिना खान आणि कॉमेडियन कपिल शर्मा यांना समन्स पाठवले आहे.

रणबीर कपूरवर महादेव बेटिंग ॲपची जाहिरात केल्याचा आणि त्या बदल्यात मोठी रक्कम मिळवल्याचा आरोप आहे. रणबीरला मिळालेली रक्कम गुन्ह्यातील होती असे ईडीचे म्हणणे आहे.

महादेव बेटिंग हे अनेक ऑनलाइन गेमिंग वेबसाइट आणि ॲप्सचे सिंडिकेट आहे. त्याचे मुख्यालय UAE मध्ये आहे आणि तेथून ते चालते. या ॲप्लिकेशनची कॉल सेंटर्स श्रीलंका, नेपाळमध्येही आहेत. ॲप कथितरित्या क्रिकेट, टेनिस, बॅडमिंटन, पोकर आणि कार्ड्ससह विविध लाइव्ह गेम्सवर बेकायदेशीर सट्टेबाजीसाठी ऑनलाइन प्लॅटफॉर्म प्रदान करते.