Amit Shah On Lok Sabha Elections:

मुंबईत इंडिया ग्लोबल फोरमच्या (IGF) वार्षिक गुंतवणूक समिट ‘NXT10’ मध्ये बोलताना गृहमंत्री अमित शहा यांनी आगामी सार्वत्रिक निवडणुकांबद्दल आपली मते व्यक्त करत या निवडणुका का महत्त्वाच्या आहेत, हे अधोरेखित केले.

ते म्हणाले, “जगभरातील निवडणुका संबंधित राष्ट्रांसाठी त्यांचे पुढील पाच वर्षांचे भविष्य ठरवतील, पण भारतातील आगामी निवडणुका आपल्या देशासाठी पुढील 25 वर्षे ठरवतील.”

आपल्या भाषणात, केंद्रीय गृहमंत्री शहा यांनी नरेंद्र मोदी यांच्या नेतृत्वाखालील सरकारचा पुढील दशकासाठी काय दृष्टीकोन आहे याची माहिती दिली.

गेल्या दहा वर्षांत केलेल्या आर्थिक, कायदेशीर आणि सामाजिक सुधारणांची माहिती देताना गृहमंत्री म्हणाले, “गेल्या दशकात पंतप्रधान मोदींनी विविध क्षेत्रांमध्ये परिवर्तनवादी बदल घडवून आणले आहेत. स्वातंत्र्याची 100 वर्षे साजरी करत असताना पुढील पाच वर्षांत घेतलेले निर्णय भारताचे जगातील स्थान निश्चित करतील."

यावेळी आपल्या भाषणादरम्यान गृहमंत्री म्हणाले की, “15 ऑगस्ट 2047 साठी आमचे ध्येय पूर्ण विकसित आणि आत्मनिर्भर राष्ट्र आणि अव्वल 3 जागतिक अर्थव्यवस्थांचा भाग असेल. हे उद्दिष्ट पूर्ण करण्यासाठी, आमच्याकडे पुढील 25 वर्षांचा रोडमॅप आहे.”