Leh Ladakh Egg Auction For Iran: माणुसकीला कोणतीही सीमा नसते, याचा प्रत्यय पुन्हा एकदा लडाखमधील लेह जिल्ह्याने जगाला दिला. मध्यपूर्वेतील भीषण युद्धात होरपळणाऱ्या इराणमधील नागरिकांच्या आणि विशेषतः लहान मुलांच्या मदतीसाठी लेहच्या जनतेने पुढाकार घेतला असून येथे एका अनोख्या लिलावाद्वारे निधी गोळा केला जात आहे. या लिलावामध्ये एका सामान्य अंड्याला तब्बल 25 हजार रुपयांची बोली लावून एका स्थानिक रहिवाशाने सर्वांचे लक्ष वेधून घेतले. बाजारात अवघ्या 10 रुपयांना मिळणाऱ्या या अंड्यासाठी एवढी मोठी रक्कम खर्च करण्यामागे केवळ आर्थिक मदत करणे हा उद्देश नसून इराणमधील मुलांवर होणाऱ्या अत्याचाराचा निषेध करणे हा मुख्य हेतू आहे.

लेहमध्ये (Leh) एका खुल्या मैदानावर इराणमधील युद्धग्रस्तांना मदत करण्यासाठी हा लिलाव आयोजित करण्यात आला. यावेळी मोठी गर्दी जमली, जिथे लोकांनी आपल्या क्षमतेनुसार दान देण्यास सुरुवात केली. शबीर हुसैन या स्थानिक रहिवाशाने लिलावात 25 हजार रुपये देऊन एक अंडे खरेदी केले. याबद्दल बोलताना शबीर म्हणाले की, "अंड्याची किंमत 10 रुपये आहे हे सर्वांना ठाऊक आहे, पण ही 25 हजारांची रक्कम आम्ही इराणमधील चिमुकल्यांसाठी देत आहोत. तिथे मुलांवर होत असलेले अत्याचार पाहून आमचे मन हेलावले आहे. ही छोटीशी आर्थिक मदत त्या पीडितांच्या कामी यावी, एवढीच आमची इच्छा आहे."

शबीर हुसैन यांनी केवळ आर्थिक मदतच नाही, तर आपल्या भावनाही व्यक्त केल्या आहेत. त्यांनी म्हटले की, आम्ही आमच्या समुदायासाठी आणि पीडितांसाठी प्रसंगी प्राण देण्यासही तयार आहोत. आमचे नेते जो आदेश देतील, त्याचे आम्ही पालन करु. सध्या केवळ मदतीचे आवाहन करण्यात आले असून, लेहच्या कानाकोपऱ्यातून लोक उत्स्फूर्तपणे पुढे येत आहेत. विशेष म्हणजे, या मदत मोहिमेत केवळ रोख रक्कमच नाही, तर लोक अन्नधान्य, कपडे आणि अगदी सोन्याचे दागिनेही दान करत आहेत. महिला आपल्या अंगावरील दागिने काढून इराणमधील गरजूंच्या मदतीसाठी स्वाधीन करत असल्याचे चित्र येथे पाहायला मिळत आहे.

लडाखच्या या दुर्गम भागातून इराणसारख्या (Iran) दूरवरच्या देशातील लोकांसाठी निर्माण झालेली ही आत्मीयता सध्या चर्चेचा विषय ठरली आहे. युद्धाच्या या कठीण काळात जगभरातून मदतीचा ओघ सुरु असला, तरी लेहच्या सामान्य नागरिकांनी दाखवलेली ही संवेदनशीलता माणुसकीचा एक मोठा संदेश देणारी ठरली आहे. लेहमध्ये संकलित झालेली ही सर्व मदत विविध माध्यमांतून इराणमधील गरजूंपर्यंत पोहोचवण्याचा प्रयत्न स्थानिक संघटनांकडून केला जात आहे. प्रतिकूल हवामानात राहणाऱ्या लडाखच्या जनतेने दाखवलेल्या या दातृत्वाचे सर्वत्र कौतुक होत आहे.