Lalu Prasad Yadav: राष्ट्रीय जनता दलाचे (RJD) सर्वेसर्वा लालू प्रसाद यादव उपचारासाठी सिंगापूरला जाऊ शकणार आहेत. त्यांच्या अर्जावर शुक्रवारी सीबीआय न्यायालयात सुनावणी झाली. सुनावणीदरम्यान त्यांच्या वकिलाने सिंगापूरला उपचारासाठी घेऊन जाण्यासाठी पासपोर्ट जारी करण्याची विनंती केली. तसेच निघण्याच्या तारखेपासून किमान 2 महिन्यांचा कालावधी द्यावा, असेही त्यांनी सांगितले. तेथून परतल्यानंतर पासपोर्ट पुन्हा न्यायालयात सादर केला जाईल.

दरम्यान, सुनावणीनंतर न्यायालयाने पासपोर्ट जारी करण्याचे आदेश दिले. तेथील डॉक्टरांनी 24 सप्टेंबर ही भेटीची तारीख दिली आहे. अटीनुसार त्यांचा पासपोर्ट सीबीआय (CBI) कोर्टात जमा आहे. 13 सप्टेंबर रोजी त्यांचे वकील प्रभात कुमार यांनी विशेष सीबीआय न्यायाधीश दिनेश राय यांच्या न्यायालयात (Court) पासपोर्ट जारी करण्यासाठी अर्ज दाखल केला होता.

तसेच, लालूप्रसाद यांनी 31 ऑगस्ट रोजी सीबीआय न्यायालयात नूतनीकरणानंतर पासपोर्ट जमा केला होता. त्यांच्या पासपोर्टचे (Passport) 12 ऑगस्ट 2022 रोजी नूतनीकरण करण्यात आले. पासपोर्टची वैधता 11 ऑगस्ट 2023 पर्यंत आहे.