Lalu Prasad Yadav Targets Amit Shah: बिहारच्या राजकारणावरुन भाजप आणि आरजेडीमधील शाब्दिक युद्ध तीव्र झाले आहे. केंद्रीय गृहमंत्री अमित शहा यांनी नुकतेच नितीश कुमार यांनी भाजपसोबतची युती तोडल्याबद्दल हल्लाबोल केला. यातच आता आरजेडी अध्यक्ष लालू प्रसाद यादव यांनी अमित शहा यांच्यावर जोरदार प्रहार केला आहे. ते शनिवारी म्हणाले की, 'अमित शहा पूर्णपणे वेडे झाले आहेत.' त्याच बरोबर, काँग्रेस नेत्या सोनिया गांधी यांच्या भेटीच्या एक दिवस आधी मुख्यमंत्री नितीश कुमार यांच्यासह आरजेडी प्रमुखांनी विरोधी ऐक्याच्या गरजेवर भर दिला.

लालू प्रसाद यादव यांचा अमित शहांवर हल्लाबोल

लालू प्रसाद यादव (Lalu Prasad Yadav) पुढे म्हणाले की, 'अमित शहा (Amit Shah) पूर्णपणे वेडे झाले आहेत. बिहारमध्ये आता त्यांची सत्ता राहीली नाही. 2024 मध्येही भाजपला पराभवाला सामोरे जावे लागेल. म्हणून ते आता बिहारमध्ये (Bihar) पुन्हा 'जंगलराज' येईल हे सांगण्याचा केविलवाणा प्रयत्न करत आहेत. गुजरातमध्ये असताना त्यांनी काय केले?'

मोठा आरोप केला

ते (अमित शाह) गुजरातमध्ये असताना जंगलराज होते, असा आरोप बिहारच्या माजी मुख्यमंत्र्यांनी केला. ते पुढे म्हणाले की, अमित शहा पूर्णपणे वेडे झाले आहेत. 2024 मध्ये केंद्रात आणि त्यानंतर पुढच्या वर्षी बिहारमध्ये भाजप पुन्हा सरकार स्थापन करेल या गृहमंत्र्यांच्या दाव्याबाबत विचारले असता ते म्हणाले की, 'ते आम्ही पाहू.'

सोनिया गांधी यांची भेट घेणार

नितीश कुमार आणि लालू प्रसाद यादव रविवारी संध्याकाळी काँग्रेस अध्यक्षा सोनिया गांधी (Sonia Gandhi) यांची भेट घेण्याची शक्यता आहे. प्रकृती अस्वास्थ्याने त्रस्त असलेले लालू प्रसाद यादव म्हणाले की, 'आम्ही विरोधी एकजुटीसाठी सर्वतोपरी प्रयत्न करत आहोत. हाच आमच्या बैठकीचा अजेंडा असेल.'

शहांनी नितीशकुमारांवर निशाणा साधला होता

बिहारचे विद्यमान मुख्यमंत्री भाजपच्या पाठीत खंजीर खुपसत आहेत. काँग्रेस आणि आरजेडीबरोबर जाऊन पंतप्रधान होण्याची महत्त्वाकांक्षा ते पूर्ण करत आहेत, असा आरोप करत शाहांनी शुक्रवारी नितीशकुमार यांच्यावर टीका केली. पूर्णिया येथे आयोजित सभेत शाह म्हणाले होते की, '2024 च्या लोकसभा निवडणुकीत नितीश कुमार आणि आरजेडी अध्यक्ष लालू प्रसाद यांच्या जोडीचा सफाया होईल. त्याचबरोबर, एक वर्षानंतर, राज्य विधानसभा निवडणुकीत भाजप स्वबळावर बहुमत मिळवेल. जनतेला महाआघाडीचे 'जंगलराज' नको आहे.'