Karnataka Crime: कर्नाटकात शिक्षकाची क्रूरता समोर आली आहे. इथे गदग जिल्ह्यातील हॅडलिन गावात असलेल्या एका सरकारी शाळेतील शिक्षकाने इयत्ता चौथीत शिकणाऱ्या मुलाला मारहाण करुन छतावरुन खाली फेकले, त्यानंतर मुलाचा मृत्यू झाला. आरोपी शिक्षक शाळेत कॉन्ट्रॅक्टवर शिकवायचा.

वास्तविक, उच्च प्राथमिक शाळेतील कंत्राटी शिक्षक मुथप्पा यांनी इयत्ता चौथीत शिकणाऱ्या भरत या विद्यार्थ्याला वर्गाबाहेर ओढून बेदम मारहाण केली. यानंतर त्याला शाळेच्या पहिल्या मजल्यावरुन खाली ढकलण्यात आले. यातच त्याचा मृत्यू झाला.

आश्‍चर्याची गोष्ट म्हणजे भरतची आईही याच शाळेत शिक्षिका असून त्यांचे नाव गीता असे आहे. त्याही या शाळेत कॉन्ट्रॅक्टवर शिवकतात. जेव्हा शिक्षक (Teacher) मुथप्पा यांनी मुलाला मारहाण करण्यास सुरुवात केली, तेव्हा भरतची आई गीता तिथे पोहोचल्या आणि आपल्या मुलाला मुथप्पापासून वाचवण्याचा प्रयत्न केला, परंतु मुथप्पाने त्यांच्यावरही हल्ला केला.

आई त्याला वाचवण्यासाठी गेली असता तिलाही मारहाण करण्यात आली

मुथप्पाने गीता यांच्यावर लोखंडी रॉडने हल्ला केला, त्याही रक्तबंबाळ झाल्या. जखमी होताच मुथप्पाने मुलाला पहिल्या मजल्यावरील टेरेसच्या काठावर नेले आणि खाली फेकले. यानंतर तात्काळ आई गीता आणि मुलगा भरत यांना रुग्णालयात दाखल करण्यात आले. मात्र भरतचा मृत्यू झाला. त्याचवेळी गीता यांच्यावर KIMS हॉस्पिटलमध्ये उपचार सुरु आहेत.

इथे, हल्ल्यानंतर आरोपी मुथप्पा शाळेतून फरार झाला. पोलिसांनी आरोपीविरुद्ध गुन्हा दाखल केला असून फरार मुथप्पाच्या शोधासाठी शोधमोहीम सुरु केली आहे. मुथप्पाने भरतला का मारले याचे कारण समोर आलेले नाही. पोलीस (Police) तपासात गुंतले आहेत.