आयपीएल २०२५ मध्ये दिल्ली कॅपिटल्सच्या पराभवानंतर प्लेऑफची शर्यत अधिकच रंगतदार झाली आहे. गुजरात टायटन्स, पंजाब किंग्ज आणि रॉयल चॅलेंजर्स बंगळुरू यांनी प्लेऑफसाठी आपली जागा निश्चित केली आहे. मात्र आता उरलेल्या एका जागेसाठी मुंबई इंडियन्स (MI), दिल्ली कॅपिटल्स (DC) आणि लखनऊ सुपर जायंट्स (LSG) यांच्यात चुरशीची लढत पाहायला मिळणार आहे.

दिल्ली कॅपिटल्सविरुद्धच्या सामन्यात विजय मिळवल्यानंतर, गुजरात टायटन्स संघ पॉइंट्स टेबलमध्ये पहिल्या स्थानावर पोहोचला आहे आणि प्लेऑफसाठी पात्र ठरला आहे. शुभमन गिलच्या नेतृत्वाखाली गुजरातने आतापर्यंत १२ सामने खेळले आहेत, त्यापैकी संघाने ९ जिंकले आहेत आणि फक्त ३ मध्ये पराभव पत्करला आहे. १८ गुणांसह त्याचा नेट रन रेट अधिक ०.७९५ आहे.

दुसरीकडे, गुजरात जिंकताच, आरसीबी आणि पंजाब किंग्जनेही प्लेऑफमध्ये प्रवेश केला. आरसीबी संघाने आतापर्यंत १२ सामने खेळले आहेत. त्याचा १७ गुणांसह नेट रन रेट अधिक ०.४८२ आहे. तो पॉइंट्स टेबलमध्ये दुसऱ्या स्थानावर आहे. दुसरीकडे, पंजाब किंग्जचा संघ तिसऱ्या क्रमांकावर आहे. त्याचा नेट रन रेट ०.३८९ असून त्याचे १७ गुण आहेत.

आता तीन संघ प्लेऑफसाठी पात्र ठरले आहेत आणि फक्त एकच स्थान शिल्लक आहे, ज्यासाठी मुंबई इंडियन्स, दिल्ली कॅपिटल्स (१३ गुण) आणि लखनौ सुपर जायंट्स (१० गुण) शर्यतीत आहेत. या तिन्ही संघांपेक्षा मुंबईकडे जास्त गुण असल्याने त्यांना अधिक संधी असल्याचे दिसते. १४ गुणांसह, त्याचा नेट रन रेट अधिक १.१५६ आहे आणि तो पॉइंट्स टेबलमध्ये चौथ्या स्थानावर आहे.

मुंबई इंडियन्स अजूनही टॉप-४ साठी सर्वात मजबूत दावेदार आहेत, मात्र एक चूक प्लेऑफमधून बाहेर फेकू शकते. दिल्लीला आता "करो या मरो" अशी स्थिती आहे. त्यामुळे पुढील काही सामने निर्णायक ठरणार आहेत.