हैदराबाद : गोव्याहून हैदराबादला जाणाऱ्या बसचा कर्नाटकच्या कमलापूरजवळ भीषण अपघात झाला आहे. एका मिनी ट्रकला धडक दिल्यानंतर बसने पेट घेतला आणि या अपघातात 10 जणांचा होरपळून मृत्यू झाला. आता या अपघाताबाबत नवी माहिती समोर येत आहे. गोव्यात सेलिब्रेशनसाठी आलेल्या पर्यटकांवर काळाने घाला घातला आहे. (Hyderabad Bus Accident)

हैदराबादमधील अर्जुन कुमार आपल्या मुलीच्या वाढदिवसाचं सेलिब्रेशन करण्यासाठी गोव्यात आले होते. या सेलिब्रेशनमध्ये कुटुंबीय आणि मित्रमंडळींना सहभागी करता यावं म्हणून त्यांनी खास बसही केली होती. सुमारे 28 जण गोव्यात या सेलिब्रेशनसाठी आले होते. मात्र या सेलिब्रेशनचा आनंद कुटुंबीयांच्या चेहऱ्यावर फार काळ टिकू शकला नाही. गोव्यातून हैदराबादला माघारी परतताना घात झाला आणि 10 जणांचा बस अपघातात होरपळून मृत्यू झाला.

शुक्रवारी सकाळी कर्नाटकमधील कमलापूर भागामध्ये एका लॉरीसोबत बसची धडक झाल्याची माहिती समोर आली आहे. ही धडक एवढी जोरदार होती की जागीच बसने पेट घेतला. सकाळी साडेसहा वाजण्याच्या आसपास हा अपघात झाल्यामुळे बसमधील बहुतेक प्रवासी झोपेतच होते. त्यामुळे अपघातानंतर बाहेर पडण्याची संधीही त्यांना मिळाली नाही. दरम्यान बसचालकाचा डुलकी लागून बसवरील ताबा सुटल्याने अपघात झाल्याचा प्राथमिक अंदाज व्यक्त केला जात आहे.

अपघातातील जखमींना कलबुर्गीतील विविध रुग्णालयांमध्ये दाखल करण्यात आलं आहे. पोलीस अधीक्षक इशा पंत यांनी घटनास्थळी धाव घेत जखमींना मदतकार्य पुरवलं.