कर्नाटक: बँकेच्या मॅनेजरला हनीट्रॅपमध्ये अडकवून त्याच्याकडून दहा लाख रुपये उकळण्याचा डाव कर्नाटक पोलिसांनी हाणून पाडला. याप्रकरणी पोलिसांनी नारळपाणी विक्री करणाऱ्या महिलेसह तिच्या तीन साथीदारांना अटक केली आहे. विजापूर जिल्ह्यातील इंडी तालुक्यात १२ नोव्हेंबर रोजी ही घटना उघडकीस आली.

मिळालेल्या माहितीनुसार, नारळपाणी विक्री करणाऱ्या महिलेने बँकेच्या मॅनेजरला प्रेमाच्या जाळ्यात ओढून त्याला ब्लॅकमेल करण्याचा प्रयत्न केला.

विशेष म्हणजे ही महिला गेल्या अनेक वर्षापासून इंडी येथील डीवायएसपी कार्यालयाशेजारी नारळ पाणी विक्रीचा व्यवसाय करत होती. महिलेने मॅनेजरला ब्लॅकमेल करुन त्याच्याकडून दहा लाख रुपये उकळण्याचा प्रयत्न केला.

याप्रकरणी बँकेच्या मॅनेजरने इंडी पोलिस स्थानकात तक्रार दाखल केली आहे. महिलेने मॅनेजरसोबत जवळीक वाढवत हळूहळू त्याला प्रेमाच्या जाळ्यात ओढले.

मॅनेजरला मैत्रिणीच्या फ्लॅटवर बोलवून संशयित महिलेने त्याच्याशी शारीरिक संबंध ठेवले. दरम्यान, याचे चित्रिकरण केल्याचा दावा करुन महिलेने मॅनेजरला धमकावण्यास सुरुवात केली.

शारीरिक संबंधाचा व्हिडिओ माझ्या जवळ असल्याचे सांगून महिलेने मॅनेजरकडे दहा लाख रुपये मागण्यास सुरुवात केली. धक्कादायक बाब म्हणजे या व्हिडिओचे चित्रिकरण करणारा व्यक्ती युट्युब पत्रकार असल्याचे समोर आले आहे.

मॅनेजरने पोलिसांत तक्रार दाखल केल्यानंतर पोलिसांनी तत्काळ कारवाई करत संशयित महिला, पत्रकार आणि इतर साथीदारांना अटक केली  आहे. याप्रकरणाचा अधिक तपास सुरु आहे.