यासिन मलिकला टेरर फंडिंग प्रकरणी जन्मठेपेची शिक्षा सुनावल्यानंतर देशाच्या गुप्तचर यंत्रणांनी दिल्ली आणि एनसीआरमध्ये हाय अलर्ट जारी केला आहे. यासिन मलिकच्या शिक्षेच्या निषेधार्थ राजधानी दिल्लीत दहशतवादी हल्ला होऊ शकतो, असे सुरक्षा यंत्रणांचे म्हणणे आहे. सुरक्षा एजन्सींच्या अधिकाऱ्यांशिवाय दिल्ली पोलिसांना सुमारे 6 ते 7 अलर्ट प्राप्त झाले आहेत.

दरम्यान, जम्मू-काश्मीरमध्ये (Jammu and Kashmir) दहशतवादी फंडिंग केल्याप्रकरणी यासिन मलिकला (Yasin Malik) आज दिल्लीतील एनआयए न्यायालयाने जन्मठेपेची शिक्षा सुनावली. तसेच दहा लाख रुपयांच्या दंडाचा देखील आदेश दिला आहे. म्हणजेच यासिन मलिकचे उर्वरित आयुष्य दिल्लीतील (Delhi) तिहार तुरुंगात व्यतीत होणार आहे. दरम्यान, दिल्ली आणि एनसीआरमध्ये दहशतवादी हल्ल्यांच्या पार्श्वभूमीवर देशाच्या गुप्तचर विभागाने हाय अलर्ट जारी केला आहे.

दिल्ली पोलिसांना (Police) गुप्तचर विभागाकडून मिळालेल्या माहितीनुसार, दिल्लीच्या तिहार तुरुंगात बंद असलेला फुटीरतावादी नेता यासिन मलिकच्या शिक्षेच्या निषेधार्थ दिल्ली एनसीआरमध्ये दहशतवादी हल्ला केला जाऊ शकतो. दिल्ली आणि एनसीआर दहशतवाद्यांच्या निशाण्यावर आहे.

सीमेपलीकडून दहशतवादी हल्ल्याची योजना

ज्या दिवशी यासिन मलिकला एनआयए कोर्टाने दोषी ठरवले होते, त्याच दिवसापासून दिल्ली पोलीस आणि सुरक्षा यंत्रणांना अलर्ट जारी करण्यात आला. यासिन मलिकला दोषी ठरवल्याच्या निषेधार्थ, त्याचे कट्टर समर्थक आणि त्याच्या जवळच्या दहशतवादी संघटनांचे प्रमुख दिल्लीत सीमेपलीकडून दहशतवादी हल्ल्याची योजना आखत आहेत.

मलिक जेल क्रमांक 7 च्या वॉर्डात एकटाच राहतो

यासिन मलिकला जन्मठेपेची शिक्षा सुनावल्यानंतर तिहार तुरुंग प्रशासनाने महत्त्वपूर्ण बैठक घेतली. ज्यामध्ये तिहार प्रशासनाने यासिन मलिकच्या सुरक्षेबाबत सूचना दिल्या आहेत. सध्या यासिन मलिक जेल क्रमांकाच्या एका वॉर्डात एकटाच राहतो. मात्र आता जन्मठेपेची शिक्षा सुनावल्यानंतर त्याच्यावर सीसीटीव्हीच्या मदतीने बारकाईने नजर ठेवण्यात येणार आहे. त्याचे जेल किंवा वॉर्ड स्थलांतरित केले जाणार की, नाही याबाबत सध्या निर्णय झालेला नाही.