Hazaribagh Bank Robbery: झारखंडमधील हजारीबाग जिल्ह्यातून गुन्हेगारीची एक अत्यंत धक्कादायक आणि खळबळजनक घटना समोर आली. बरही येथील 'बँक ऑफ महाराष्ट्र'च्या शाखेवर भरदिवसा सशस्त्र दरोडेखोरांनी हल्ला चढवून सुमारे 6 ते 7 कोटी रुपयांचे सोने आणि लाखो रुपयांची रोकड लुटून नेली. वर्दळीच्या रस्त्यावर असलेल्या बँकेत अवघ्या 10 ते 15 मिनिटांत ही मोठी लूट झाल्याने पोलीस प्रशासनाच्या सुरक्षा व्यवस्थेवर मोठे प्रश्नचिन्ह उभे राहिले. या घटनेनंतर संपूर्ण परिसरात दहशतीचे वातावरण पसरले असून पोलिसांनी नाकेबंदी करुन तपास वेगाने सुरु केला.

मिळालेल्या माहितीनुसार, बरही परिसरातील मुख्य रस्त्यालगत असलेल्या बँक ऑफ महाराष्ट्रच्या शाखेत नेहमीप्रमाणे कामकाज सुरु होते. बँकेत ग्राहकही उपस्थित होते. दुपारी अचानक चार ते पाच सशस्त्र दरोडेखोर हातात शस्त्रे घेऊन बँकेत घुसले. त्यांनी क्षणात तिथे उपस्थित असलेले कर्मचारी आणि ग्राहकांना ओलीस धरले. शस्त्राचा धाक दाखवून दरोडेखोरांनी बँकेच्या कर्मचाऱ्यांना लॉकर उघडण्यास भाग पाडले. अत्यंत नियोजित पद्धतीने त्यांनी लॉकरमधील सुमारे 6 ते 7 कोटी रुपये किमतीचे सोने आपल्या ताब्यात घेतले. याव्यतिरिक्त, काउंटरवर असलेली 4 ते 5 लाख रुपयांची रोख रक्कमही त्यांनी लंपास केली.

प्रत्यक्षदर्शींनी दिलेल्या माहितीनुसार, हे दरोडेखोर पूर्ण तयारीनिशी आले होते. त्यांनी बँकेत शिरल्यापासून लूट करुन पसार होईपर्यंतची सर्व प्रक्रिया अवघ्या 15 मिनिटांत पूर्ण केली. यावरुन त्यांनी आधीच या गुन्ह्याचा सखोल कट रचल्याचे स्पष्ट होत आहे. बँक लुटल्यानंतर दरोडेखोर वेगाने तिथून पसार झाले. या घटनेची माहिती मिळताच पोलीस पथक घटनास्थळी दाखल झाले. बँकेतील सीसीटीव्ही फुटेजची तपासणी केली जात असून दरोडेखोरांच्या मार्गाचा माग काढला जात आहे. बँक (Bank) अधिकाऱ्यांकडून झालेल्या नुकसानीचा नेमका आकडा स्पष्ट केला जात असला तरी, प्राथमिक अंदाजानुसार ही या भागातील आतापर्यंतची सर्वात मोठी बँक लूट मानली जात आहे. या घटनेने हजारीबागसह संपूर्ण झारखंडमध्ये खळबळ उडाली.