Sunburn Festival Noise Pollution Monitor Team

पणजी: मोठ्या आवाजात पार्ट्या वाजत असेल तर ते रोखण्याचे काम पोलिसांचे आहे. पोलिसांनी ते करणे अपेक्षित आहे. ध्वनी नियमांचे उल्लंघन होते की नाही हे तपासण्याचे यंत्र जरी गोवा प्रदूषण नियंत्रण महामंडळाकडे असले तरी याचे प्रशिक्षण पोलिसांना देखील देण्यात आले आहे. सनबर्न येथे ध्वनी प्रदूषण नियमांचे उल्लंघन होत असेल तर ते तपासण्यासाठी आम्ही ४ टीम तयार केल्याची माहिती गोवा प्रदूषण नियंत्रण महामंडळ अध्यक्ष महेश पाटील यांनी दिली.

किनारी भागात प्रामुख्याने डिसेंबरमध्ये ध्वनी प्रदूषण होत असल्याच्या तक्रारी लोक करत असतात. आता वर्षाच्या अखेरीस किनारी भागात होणाऱ्या पार्ट्यांमुळे ध्वनी प्रदूषण होण्याची शक्यता आहे.

तीन रात्रींसाठी मुभा

१. ध्वनी प्रदूषणावर नियंत्रण ठेवण्यासाठी आणि पर्यटकांचा विचार करून दोन्ही बाजूचा समतोल राखण्याच्या दृष्टीने पर्यावरण आणि हवामान बदल विभागाने २४ ते २६ आणि ३१ डिसेंबर रोजी रात्री १२ वाजेपर्यंत संगीत पार्ट्या करण्याची मुभा दिली आहे.

२. पर्यावरण आणि हवामान बदल विभागाने प्रदूषण नियमावलीत बदल करून २०२४ मध्ये वरील उल्लेख केलेल्या चार रात्री १० ते १२ या वेळेत लाऊडस्पीकर वापरण्यास परवानगी दिली आहे.

३. या नियमांचे पालन होत आहे की नाही यावर नजर ठेवण्यासाठी संबंधित अधिकारी देखील नेमण्यात आले आहेत.

४. विभागाने परवानगी देण्याचे निश्चित केले असले तरी ठराविक परवानगी देण्याचे नियम बदलण्यात आले आहे. काहींना परवानगी केवळ ग्रामपंचायत, नगरपालिका किंवा राज्य सरकारने मान्यता दिलेल्या संस्थेच्या विनंतीवरच दिली जाईल.