मेरशी इथल्या ‘साधना देल आर्ट’ मधल्या उपक्रमांची वर्षसमाप्ती पश्चिम बंगालमधल्या ग्रामीण पारंपरिक हस्तकला प्रदर्शनाने होत आहे. या प्रदर्शनात प्रणब कुमार डे यांचे ‘सीतालपती’, संताना बीबी यांचे ‘कांथा’, हरिपदा दास अधिकारी यांचे ‘मडूर’ आणि रहीम चित्रकार यांचे ‘पतचित्र’ अशा विविध हस्तकलांचे प्रात्यक्षिक आणि कलेसंबंधात त्यांच्याबरोबर संवाद होईल.

‘सीतालपती’ हे चटयांवरील पारंपारिक विणकाम आहे, पण त्याव्यतिरिक्त या कलेत वाकबगार असलेले प्रणब कुमार डे हे या कलेद्वारे बॅग, बॉक्स वगैरे आकर्षक वस्तूदेखील तयार करतात.‘कांथा’ हे विविध पेहरावांवर केले जाणारे नक्षीदार विणकाम आहे. साडी (saree) , दुपट्टा, बॅगा वगैरे वस्तूंवर हे विणकाम करून त्या वस्तू आकर्षक बनवल्या जातात. संताना बीबी यांनी यापूर्वी आपल्या या कलेचे प्रदर्शन देशभरात केले आहे.

टेबल मॅट, वॉल हैंगिंग, पडदे वगैरे आकर्षकरित्या विणण्याच्या ‘मडूर’ कलेत हरिपदा दास यांनी कौशल्य मिळवले आहे. त्यांच्या या हस्तकलेचे प्रदर्शन देशभरात होत असते. रहीम चित्रकार आपल्या वयाच्या आठव्या वर्षापासून ‘पतचित्र’ या पारंपरिक शैलीतून चित्रे रंगवत आहेत. राज्य पुरस्काराने सन्मानित या कलाकाराने देशाच्या महत्त्वाच्या शहरांमधून आपली चित्रे सादर केली आहेत.पश्चिम बंगालमधल्या (West Bangal) हस्त कलाकारांचे हे प्रदर्शन आज पासून सुरू होत असून ते 30 डिसेंबरपर्यंत चालेल. हे प्रदर्शन सर्वांसाठी खुले आहे.