वॉशिंग्टन: अमेरिकेचे अध्यक्ष डोनाल्ड ट्रम्प यांनी भारतावर २५ टक्के आयातशुल्क लागू करण्याची घोषणा केली. हा कर एक ऑगस्टपासून लागू होणार आहे. भारताबरोबरील व्यापारतूट प्रचंड मोठी आहे, असे ट्रम्प यांनी म्हटले आहे. भारत आणि अमेरिकेतील संभाव्य व्यापार कराराच्या चर्चेत अडथळा आल्याचेच हे निदर्शक मानले जाते.

मागील चार महिन्यांपासून ‘आयात शुल्क धोरण’ हे डोनाल्ड ट्रम्प यांच्या परराष्ट्रनीतीचा भाग बनला असल्याचे चित्र आहे. ट्रम्प यांनी आज ‘एक्स’वर पोस्ट करत भारतावर २५ टक्के आयातशुल्क लागू करण्याची घोषणा केली.

याबाबतचे सूतोवाच त्यांनी कालच (ता. २९) केले होते. भारताकडून अमेरिकी वस्तूंवर मोठ्या प्रमाणावर कर लादला जात असल्याच्या आपल्या दाव्याचा पुनरुच्चार करतानाच ट्रम्प यांनी भारताने रशियाकडून प्रचंड प्रमाणात लष्करी साहित्य आणि इंधन खरेदी करणे, अमेरिकेला नको असलेले व्यापार अडथळे निर्माण करणे अशी कारणेही आयातशुल्कात वाढ करताना दिली आहेत.

तसेच, या २५ टक्के आयातशुल्का बरोबरच भारताला एक ऑगस्टपासून दंडही भरावा लागणार असल्याचे ट्रम्प यांनी म्हटले आहे.

भारतावर अमेरिकेने आकारलेले २५ टक्के शुल्क निराशाजनक आहे. ट्रम्प यांनी दंड आकारणार असे म्हटले असले तरी ते नेमके काय करणार हे स्पष्ट नाही. येत्या काही महिन्यांत भारत आणि अमेरिकेचा द्विपक्षीय करार होईल आणि हे शुल्क लक्षणीयरीत्या कमी होईल अशी अपेक्षा आहे.

- डॉ. अजय सहाय, निर्यात संघटनेचे महासंचालक