आंध्र प्रदेश: पतीचे बाहेर अफेअर सुरु असल्याचा संशय आल्याने पत्नीने पती आणि घरातील कामवालीचे अपहरण केल्याची घटना उघडकीस आली आहे. याप्रकरणी महिलेच्या सासूने पोलिसांत तक्रार दिल्यानंतर बुधवारी (१५ ऑक्टोबर) हा प्रकार उघडकीस आला. महिला पोलिस कॉन्स्टेबल म्हणून कार्यरत आहे. आंध्रप्रदेश राज्यातील सत्य साई जिल्ह्यातील कादिरी येथे ही घटना घडली.

मंजुळा असे अपहरणकर्त्या पोलिस कॉन्स्टेबल महिलेचे नाव आहे. तिरुपती जिल्ह्यातील तिरुचानूर पोलिस ठाण्यात कॉन्स्टेबल म्हणून कार्यरत आहे. तर, तिचा पती एका खासगी कंपनीत काम करत असल्याची माहिती समोर आली आहे. पाच वर्षापूर्वी दोघांचा विवाह झाला होता. पण, कामामुळे दोघेही वेगवेगळ्या ठिकाणी राहतात.

पत्नी मंजुळा तिरुपती येथे राहते तर पती आई – बाबांसोबत एनजीओ कॉलनी कादिरी येथे वास्तव्यास आहे. लग्नाच्या काही काळानंतर पतीचे बाहेर अफेअर सुरु असल्याचा संशय पत्नी मंजुळाला येऊ लागला.

मंगळवारी (१४ ऑक्टोबर) मंजुळा पंधरा लोकांसमवेत पतीच्या घरात घुसली आणि तिने पतीसह घरातील कामवालीचे अपहरण केले. यानंतर पतीच्या आईने कादिरी पोलिस स्थानकात अपहरणाची तक्रार दाखल केली. 

पोलिसांनी या प्रकरणाचा तपास सुरु केल्यानंतर या घटनेमागील सत्य समोर आले आहे. मंजुळा लोकांना घेऊन घरात घुसली त्यावेळी तिने पतीच्या आई – वडिलांना मारहाण केल्याचे देखील तक्रारीत नमूद करण्यात आले आहे. अफेअरच्या संशयातून हा प्रकार घडल्याचे सांगितले जात असून, याप्रकरणी पोलिस अधिक तपास करत आहेत.