Chandrayaan-2 Orbiter Took Photos Of Vikram Lander Of Chandrayaan 3:

भारताची तिसरी चंद्र मोहीम चांद्रयान-3 यशस्वी झाली आहे. बुधवारी संध्याकाळी 6.04 वाजता चांद्रयान-3 च्या लँडरने चंद्राच्या पृष्ठभागावर सॉफ्ट लँडिंग केले.

आता चांद्रयान-2 च्या ऑर्बिटर हाय-रिझोल्यूशन कॅमेरा (OHRC) ने चांद्रयान-3 च्या विक्रम लँडरचे छायाचित्र टिपले आहे.

ऑर्बिटर हाय-रिझोल्यूशन कॅमेरा हा सध्या चंद्राभोवती फिरणारा हाय रिझोल्यूशन कॅमेरा आहे. यामध्ये सौर पॅनेलसह लँडर आणि डिसेंट प्रोपल्शन सिस्टम दिसत आहे.

याबाबत ची माहिती चांद्रयान-3 ची अधिकृत माहिती देण्यासाठी सुरू केलेल्या LVM3-M4/CHANDRAYAAN-3 MISSION या ट्विटर अकाऊंटवरुन देण्यात आली आहे.

या ट्विटमध्ये चांद्रयान-3 ला उद्देशून म्हटले आहे की, "माझं तुझ्यावर लक्ष आहे. चांद्रयान-2 च्या ऑरबिटरने चांद्रयान-3 च्या विक्रम लॅंडरचे छायाचित्र टिपले आहे. चांद्रयान-2 चे ऑरबिटर हाय-रिझोल्यूशन कॅमेऱ्याने सुसज्ज आहे. सध्या चंद्रावर असा एकमेव कॅमेरा आहे."

चांद्रयान-३ ही भारताची तिसरी चंद्र मोहीम आहे. पहिले, चांद्रयान-1, 2008 मध्ये प्रक्षेपित केले गेले आणि एक वर्ष चंद्राभोवती फिरले. दुसरे, चांद्रयान-2 (Chandrayaan 2), 2019 मध्ये प्रक्षेपित केले गेले, परंतु लँडिंग दरम्यान त्याचा लँडरशी संपर्क तुटल्याने ते अयशस्वी झाले.

या अपयशाने खचून न जाता भारताने चांद्रयान-3 च्या माध्यमातून चंद्राच्या दक्षिण ध्रुवावर उतरण्याचे स्वप्न पूर्ण केले.

भारताने या चांद्रयान-3 मोहिमेसाठी तब्बल 600 कोटी रुपयांचा खर्च केला आहे. याचे प्रक्षेपण 14 जुलै रोजी LVM3 रॉकेटद्वारे सतिश धवन स्पेस सेंटर श्रीहरीकोटा येथून करण्यात आले.

चांद्रयान-3 ने 14 जुलै रोजी प्रक्षेपण केल्यानंतर त्याने 5 ऑगस्ट रोजी चंद्राच्या कक्षेत प्रवेश केला. आणि बुधवारी सध्याकाळी 6:04 मिनिटांनी चांद्रयान 3 च्या विक्रम लॅंडरने चंद्राच्या दक्षिण ध्रुवावर सॉफ्ट लॅंडिंग केले.