CBI Action on Sameer Wankhede: एनसीबीचे माजी अधिकारी समीर वानखेडे यांच्या अडचणी पुन्हा एकदा वाढू लागल्या आहेत. सीबीआयने समीर वानखेडे आणि इतर अनेक आरोपींविरुद्ध गुन्हा दाखल केल्याचे वृत्त आहे.

शाहरुख खानचा मुलगा आर्यन खान याला ड्रग्ज प्रकरणात अडकवण्याचा प्रयत्न केल्याचा आरोप वानखेडे यांच्यावर आहे. यानंतर सीबीआयने (CBI) दिल्ली, मुंबई आणि रांचीसह 29 ठिकाणी एकामागून एक छापे टाकले.

दरम्यान, लाचखोरी प्रकरणात वानखेडे आणि इतरांची चौकशी करण्यासाठी एनसीबीने सीबीआयला पत्र लिहिले होते. विशेष तपास पथकाने (एसआयटी) कॉर्डेलिया छाप्यात तफावत आढळून आल्यानंतर आणि आर्यन खानला क्लीन चिट दिल्यानंतर

गेल्या वर्षी वानखेडे यांना एनसीबीमधून काढून टाकण्यात आले होते. वानखेडे हे सध्या चेन्नई (Chennai) येथील डायरेक्टर जनरल ऑफ टॅक्सपेयर्स सर्व्हिसेस (DGTS) च्या कार्यालयात तैनात आहेत.

गेल्या आठवड्यात, NCB ने पोलिस अधीक्षक दर्जाचे अधिकारी - विश्व विजय सिंह यांना एजन्सीच्या सेवेतून काढून टाकले.

वानखेडे हे भारतीय महसूल सेवा (IRS) अधिकारी आहेत. 2021 मध्ये त्यांच्या नेतृत्वाखाली, NCB ने जहाजातून 13 ग्रॅम कोकेन, पाच ग्रॅम मेफेड्रोन, 21 ग्रॅम गांजा, 22 MDMA गोळ्या आणि ₹ 1.33 लाखाची रोकड जप्त केल्याचा दावा केला होता.

एजन्सीने 14 लोकांना पकडले होते. यामध्ये आर्यन खान (24), अरबाज मर्चंट (26) आणि मुनमुम धमेचा (28) यांना काही तासांच्या चौकशीनंतर 3 ऑक्टोबर रोजी अटक केली. त्यानंतर, एजन्सीने छापे टाकल्याप्रकरणी आणखी 17 जणांना अटक केली होती.

व्हॉट्सअ‍ॅप चॅट्सच्या आधारे, वानखेडे यांच्या टीमने आरोपी मोठ्या कटाचा भाग असल्याचा दावा केला होता. आर्यन खान स्व:ता काही परदेशी ड्रग्ज सप्लायरच्या संपर्कात असल्याचा आरोप करण्यात आला होता. विशेष म्हणजे, चॅटमध्ये "हार्ड ड्रग्स" असा उल्लेख करण्यात आला होता.

तथापि, एनसीबीचे दावे फेटाळताना, मुंबई उच्च न्यायालयाच्या न्यायमूर्ती नितीन डब्लू सांबरे यांच्या एकल खंडपीठाने गेल्या वर्षी ऑक्टोबरमध्ये म्हटले होते की, कोणत्याही कटाचे अस्तित्व सूचित करणारे कोणतेही पुरावे नाहीत.