बिहारची राजधानी पाटणा येथे भाजपाचे माजी आमदाराच्या दोन सख्ख्या भावांचा दुचाकीवरून जात असताना पाठलाग करुन अज्ञातांनी पत्रकार चौकात दोघांवर गोळ्या झाडत निघृण हत्या केल्याचीबाब समोर आली आहे. या वर्षी एप्रिल महिन्यात चित्तरंजन शर्मा यांच्या कुटुंबातील दोन सदस्यांची गोळ्या झाडून हत्या करण्यात आली होती. आणि आज पुन्हा दोन भावांची हत्या करण्यात आली आहे. (brothers of former BJP MLA shot dead in Bihar )

चित्तरंजन शर्मा यांचे सख्खे भाऊ शंभू शर्मा आणि गौतम शर्मा यांची गोळ्या झाडून हत्या करण्यात आल्याची घटना घडली आहे. या घटनेत दोघांचा जागीच मृत्यू झाला आहे.याबाबत मिळालेल्या माहितीनुसार, दोन्ही भाऊ दुचाकीवरून जात होते. त्यावेळी त्यांचा पाठलाग करणाऱ्या गुन्हेगारांनी पत्रकार चौकात त्यांना ओव्हरटेक केले आणि दोघांवर गोळ्या झाडल्या. चित्तरंजन शर्मा हे धनरुआ पोलीस ठाण्याच्या हद्दीतील नीमा गावचे रहिवासी आहेत. गोळीबार झालेल्या दोघांपैकी एक चार्टर्ड अकाउंटंट म्हणून काम करत होता आणि दुसरा वेब पोर्टलवर पत्रकार म्हणून काम करत होता.

या घटनेमागे जुने वैमनस्य असल्याचे सांगितले जात असून यासाठी नीमा गावातील पांडव सेनेचे प्रमुख संजय सिंह यांच्यावर आरोप करण्यात येत आहे. यापूर्वी झालेल्या हत्येचा आरोपही संजय सिंगवर होता. चित्तरंजन शर्मा आणि संजय सिंह यांच्यात जुने वैर आहे.नीमा गावात दोन गटांमध्ये तणाव आहे. यापूर्वीही दोन्ही बाजूंनी अनेक हत्या झाल्या आहेत. मात्र, अद्याप लेखी अर्ज न दिल्याने या घटनेत नीमा गावातील पांडव टोळीचा हात आहे की नाही हे सांगणे योग्य नाही.