पंजाब विधानसभेच्या निवडणुकीत आपचे उमेदवार लाभसिंग उगोके (Labh Singh) यांनी माजी मुख्यमंत्री चरणजित सिंग चन्नी (Charanjit Singh Channi) यांचा पराभव केला. या पराक्रमानंतर उगोके चर्चेत आले आहेत. ते कोण आहेत, ते काय करतात अशा चर्चा सुरु झाल्या आहेत. उगोके यांच्या कुटुंबाबद्दल सांगायचे तर त्यांची आई एक सफाई कामगार आहे, ज्याचा त्यांना अभिमान आहे. इतकचं नाही तर मुलगा विजयी झाला असला तरी आई सफाई कामगाराची नोकरी सोडण्यास तयार नाहीत, त्यांच्या या कृतीमुळे त्यांनी सर्वांचेच मन जिंकले आहे. (Baldev Kaur mother of AAP Labh Singh not left sweeper job)

लाभसिंह यांच्या आई बलदेव कौर (Baldev Kaur) या सरकारी शाळेत कंत्राटी सफाई कामगार आहेत. शुक्रवारी त्या झाडू घेऊन ड्युटीसाठी पोहोचल्या तेव्हा बलदेव यांनी सर्वांनाच चकित केले. एक दिवस आधी, त्यांच्या मुलाने पंजाबच्या मुख्यमंत्र्यांचा 37 हजार 558 च्या मोठ्या फरकाने पराभव केला आणि दुसऱ्या दिवशी त्या आपल्या कामावर रूजू झाल्या होत्या. त्यांच्या कृतीने आणि कामाप्रति असलेल्या प्रामाणिकपणामुळे बलदेव कौर यांनी माध्यमांचे आणि सर्वसामान्यांचेही लक्ष वेधले.

यावेळी बोलताना बलदेव म्हणाल्या, "माझ्या मुलाच्या विजयानंतर (Punjab Assembly Election) किमान एक दिवस तरी मी कामावर येणार नाही, असे सर्वांना वाटत होते. पण मी हे स्पष्ट केले की माझा मुलगा आमदार झाला आहे, मी नाही. मी अजूनही कंत्राटी सफाई कामगार आहे. त्यामुळे मुलगा आमदार झाला म्हणून मी माझी नोकरी का सोडू? आणि मी जे करत आहे त्याचा मला अभिमान आहे. आमचे कुटुंब उदरनिर्वाहासाठी धडपडत असताना माझी हिच नोकरी आमच्या कमाईचा एक महत्त्वाचा स्रोत होता आणि आताही आहे."

सेवा नियमित न केल्याने संतापलेल्या

बलदेव कौर यांचे वय आता 50 वर्षांहून अधिक आहे. त्या गेल्या 22 वर्षांपासून बर्नाळा जिल्ह्यातील त्यांच्या मूळ गावी उगोके येथील शाळेत कार्यरत आहे. मात्र अद्याप त्यांची नोकरी नियमीत नाही. त्यामुळे त्यांचा सरकारवर प्रचंड रोष आहे. त्या म्हणाल्या की, माझी नोकरी नियमिती करणासाठी मी वारंवार सरकारी ऑफिसच्या चकरा घातल्या. मात्र प्रत्येक वेळी तो प्रस्ताव फेटाळण्यात आला.

'वास्तविक विरुद्ध कृत्रिम गरीब' हा निवडणूक मुद्दा यशस्वी ठरला होता

बलदेव कौर यांच्या घरातून आणि त्यांच्या वागणुकीतून कुटुंबाची नम्रता दिसून येते. मुख्यमंत्री चन्नी यांच्या विरोधात 'खरे विरुद्ध कृत्रिम गरीब' हा निवडणुकीचा मुद्दा बनवण्यात लाभसिंह यशस्वी ठरले. बलदेव कौर यांचे पती दर्शन सिंह हे आयुष्यभर मजूर होते, पण नुकतेच डोळ्याच्या शस्त्रक्रियेनंतर त्यांनी काम करणे बंद केले आहे.