पाच राज्यांमध्ये होणाऱ्या विधानसभा निवडणुकीची मतमोजणी सुरू आहे. यूपीमध्ये भाजप पुन्हा एकदा सरकार स्थापन करताना दिसत आहे. निकालानुसार भाजपला पूर्ण बहुमत मिळाले आहे. उत्तराखंडमध्येही भाजपचे पुनरागमन होताना दिसत आहे. त्याचवेळी पंजाबमध्ये आम आदमी पक्ष आघाडीवर आहे. गोवा आणि मणिपूरमध्ये भाजप बहुमताच्या उंबरठ्यावर आहे. (Assembly election results 2022 updates)

दरम्यान, गोव्यात भाजप आणि काँग्रेसमध्ये (Congress) चुरस आहे. गोव्यातील विधानसभेच्या (Assembly) 40 जागांचा कल पाहिला तर भाजपला 19 तर काँग्रेसला 12 जागा मिळत आहेत. गोव्यात टीएमसी 3 जिंकताना दिसत आहे तर AAP 2 आणि इतरांना 4 जागी विजय मिळाला आहे.

दरम्यान, उत्तराखंडमधून काँग्रेसला मोठा धक्का बसला आहे. हरीश रावत यांना उत्तराखंडच्या लालकुआन मतदारसंघातून पराभवाला सामोरे जावे लागले आहे. हरीश रावत हे उत्तराखंडमध्ये मुख्यमंत्रीपदाचे प्रमुख दावेदार मानले जात होते. हरीश रावत यांचा 13893 मतांनी पराभव झाला आहे.

आज विधानसभा निवडणुकीच्या 23 दिवसांनंतर उत्तराखंडमधील (Uttarakhand) सर्व 70 विधानसभा जागांवर निवडणुकीचे निकाल येऊ लागले आहेत आणि लवकरच फायनल निकालही पाहायला मिळणार आहे. ज्या प्रकारे निकाल समोर येत आहेत, त्यावरून राज्यात भाजपचे सरकार स्थापन होत असल्याचे दिसून येत आहे.