दिल्लीचे मुख्यमंत्री अरविंद केजरीवाल यांनी निवडणूक आयोगाने महानगरपालिका निवडणुका पुढे ढकलल्याबद्दल नाराजी व्यक्त केली आहे. निवडणूक आयोग केंद्र सरकारपुढे झुकल्याचा आरोपही त्यांनी केला आहे. मुख्यमंत्र्यांनी शुक्रवारी पत्रकार परिषद घेऊन केंद्रावर बोचरी टीका केली.

पत्रकार परिषदेत केजरीवाल म्हणाले, राज्य निवडणूक आयोग (Election Commission) 9 मार्च रोजी महानगरपालिका निवडणुकांच्या तारखा जाहीर करणार होते, मात्र केंद्राने निवडणूक आयोगाला पत्र लिहून कळवले की त्यांना दिल्लीतील (Delhi) तीन महानगरपालिका एकत्र करायच्या आहेत. यानंतर निवडणूक आयोगाने निवडणुका पुढे ढकलण्याची घोषणा केली, असा आरोप केजरीवाल यांनी केला.

केजरीवाल म्हणाले, लोक विचारत आहेत की तीन महानगरपालिका एकत्र करण्यासाठी निवडणुका पुढे ढकलण्याची काय गरज आहे? ते पुढे म्हणाले, मी पंतप्रधान नरेंद्र मोदी (Narendra Modi) यांना हात जोडून विनंती करतो की निवडणूक रद्द करू नका. देशात सत्तांतर होत राहील. आज आपण आहोत, उद्या कुणी दुसरे असेल. मात्र हा देश बदलणार नाही. आपण सर्वजण एकत्र येऊन देशासाठी काम करूया.