दिल्लीचे मुख्यमंत्री आणि आम आदमी पार्टीचे सर्वेसर्वा अरविंद केजरीवाल 28 ते 30 जानेवारी दरम्यान पंजाब दौरा करणार आहेत. या दौऱ्यादरम्यान ते अमृतसरसह अनेक विधानसभा मतदारसंघांना ते भेट देणार आहेत. आगामी पंजाब (Punjab) विधानसभा निवडणुकीसाठी आम आदमी पार्टी जोरदार प्रचार करत आहे. (Arvind Kejriwal Rahul Gandhi Latest News)

आम आदमी पार्टीचे (AAP) पंजाबचे मुख्यमंत्रीपदाचे उमेदवार भगवंत मान म्हणाले की, आमचे सरकार स्थापन झाल्यास पंजाबमध्ये अमंली पदार्थ आणि अमंली पदार्थांच्या व्यसनापासून मुक्ती मिळवण्यासाठी ड्रग टास्क फोर्स तयार करण्यात येईल. यामध्ये कोणताही राजकीय हस्तक्षेप होणार नाही. पंजाब पोलिसांना ड्रग्जच्या विरोधात कारवाई करण्यास मोकळीक दिली जाईल.

केजरीवाल यांच्या दौऱ्याआधी राहुल गांधी (Rahul Gandhi) पंजाबला भेट देणार आहेत. ते 27 जानेवारीला पंजाबमध्ये दाखल देतील. गांधी जालंधरमध्ये व्हर्च्युअल रॅलीला संबोधित करणार आहेत. पंजाब काँग्रेसचे प्रमुख नवज्योत सिंग सिद्धू यांनी ही माहिती दिली.

सिद्धू म्हणाले की, वेळापत्रकानुसार, राहुल गांधी श्री हरमंदिर साहिब, अमृतसर येथे नमन करतील आणि 117 उमेदवारांसह भगवान वाल्मिकी तीर्थक्षेत्राला भेट देतील. दिल्ली-अमृतसर विशेष विमानाने ते सकाळी आठ वाजता विमानतळावर येतील. तेथून रस्त्याने ते श्री हरमंदिर साहिबला जातील.