Russia Ukraine Crisis: रशिया-युक्रेन संघर्षात एका भारतीय विद्यार्थ्याला आपला जीव गमवावा लागला आहे. युक्रेनमध्ये झालेल्या बॉम्बस्फोटात एका भारतीय विद्यार्थ्याचा मृत्यू झाला आहे. परराष्ट्र मंत्रालयाने यास दुजोरा दिला आहे. (An Indian student was killed in a bomb blast in Ukraine)

मिळालेल्या माहितीनुसार, हा विद्यार्थी कर्नाटक राज्यातील असून युक्रेनमधील खार्किवमध्ये झालेल्या गोळीबारात त्याचा मृत्यू झाला आहे. युक्रेनवरील रशियन हल्ला हा सहावा दिवस आहे. रशिया आणि युक्रेन यांच्यात काल झालेली चर्चा अपयशी ठरली आहे. त्यानंतर रशियाने युक्रेनची राजधानी असणाऱ्या खार्कीव्हसह इतर प्रमुख शहरांवर गोळीबकार करण्यास सुरुवात केली आहे. यातच आज खार्किवमध्ये झालेल्या हल्ल्यात एका भारतीय विद्यार्थ्याचा मृत्यू झाला.

परराष्ट्र व्यवहार मंत्रालयाचे प्रवक्ते अरिंदम बागची यांनी ट्विट करत म्हटले की, "आम्ही दुःखी आहोत. खार्किवमध्ये आज सकाळी एका भारतीय विद्यार्थ्याचा गोळीबारात मृत्यू झाला. मंत्रालय त्याच्या कुटुंबाच्या संपर्कात आहे. आम्ही कुटुंबाप्रती शोक व्यक्त करतो."

याच पाश्वभूमीवर ब्रिटनच्या संरक्षण मंत्रालयाने सांगितले की, 'रशियन सैन्याने युक्रेनची राजधानी असणाऱ्या कीवच्या उत्तरेकडील भागात आणि चेर्निहाइव्ह या शहरांमध्ये हल्ले तीव्र केले आहेत. दाट लोकवस्तीच्या भागामध्ये रशियन सैन्याकडून तोफ गोळ्याचा मारा केला जात आहेत. रशियन हल्ल्यात आत्तापर्यंत युक्रेनचे 70 सैनिक ठार झाले आहेत. रशियन हल्ल्यानंतर पाच दिवसांत जवळपास 3.5 दशलक्ष युक्रेनियन निर्वासितांनी शेजारी असणाऱ्या पोलंडमध्ये आश्रय घेतला आहे.'

पोलंडच्या उप मंत्र्यांनी मंगळवारी स्पष्ट केले की, 'रशियन आक्रमणानंतर सुमारे 350,000 लोक युक्रेनमधून पोलंडमध्ये दाखल झाले आहेत.'