Adhir Ranjan Chowdhury: गृहमंत्री अमित शहा यांच्या आरोपांमुळे संतप्त झालेले काँग्रेसचे लोकसभेतील गटनेते अधीररंजन चौधरी यांनी ‘पीएम केअर’ फंडमधील निधीचा आढावा घ्यावा, असा टोला गृहमंत्र्यांना लगावला. पीएम केअर फंडमध्ये कोणी देणग्या दिल्या आणि त्यात चिनी कंपन्यांची देणगी किती आहे हे पहावे, असे आव्हान अधीररंजन चौधरी यांनी दिले.

तर, काँग्रेसने सवालांची फैर झाडत भाजपवरच चीनशी संबंधांचा प्रतिहल्ला चढवला. भाजपचे प्रतिनिधीमंडळ 2019मध्ये चीन दौऱ्यावर कशासाठी गेले होते? 2017 मध्ये मोदी सरकारने यूसी वेब मोबाईल या चिनी कंपनीवर डेटा चोरीचा आरोप केला होता,

तरी 2019मध्ये भाजपने निवडणुकीतील ब्रॅन्डींगसाठी याच कंपनीचा वापर का केला?, जागतिक बॅंकेने बंदी घातलेल्या डाँगफेंग कंपनीला मोदी सरकारने काश्मीरमध्ये स्मार्ट मीटरचा प्रकल्प का दिला? मोदींचा गुजरातमध्ये पराभव झाल्यास चीनचे नुकसान होईल, असे चीनमधील ग्लोबल टाईम्सने का म्हटले, अशी सवालांची फैर काँग्रेसने झाडली.

दरम्यान गुजरात विधानसभा निवडणुकीत भाजपच्या दणदणीत विजयानंतर भाजपच्या संसदीय पक्षाच्या आगामी बैठकीत या ऐतिहासिक विजयाबद्दल पंतप्रधान नरेंद्र मोदी यांचा जंगी सत्कार व अभिनंदन करण्यात येणार आहे. ही बैठक बुधवारी संसदेच्या बालयोगी सभागृहात होईल, असे पक्षसूत्रांनी सांगितले. अधिवेशनातील पहिलीच बैठक असल्याने पंतप्रधान मोदी त्यात स्वपक्षीय खासदारांना कोणता ‘संदेश‘देणार याबाबत उत्सुकता आहे.

‘आप’मधून इनकमिंग ?

गुजरात विधानसभा निवडणुकीत भाजपचा हा सलग सातवा विजय आहे. काँग्रेसने 17 तर आम आदमी पक्षाने (आप) 5 जागा जिंकल्या. मात्र ‘आप’चे पाचही नवनिर्वाचित आमदार भाजपच्या वाटेवर असल्याची चर्चा दिल्लीत आहे. हे पाच आणि काही अपक्ष भाजपमध्ये गेले तर गुजरातेत भाजपच्या जागांची संख्या 160च्या वर जाते व त्या स्थितीत भाजपचे विधानसभेतील संख्याबळ दिल्ली किंवा पंजाबमधील ‘आप’च्या विजयाप्रमाणे भव्य असेल.