A 22-year-old man recently died in Kochi after being treated for poisoning after eating "shawarma":

"शॉरमा" खाल्ल्याने विषबाधा झाल्यानंतर उपचार घेत असलेल्या 22 वर्षीय तरुणाचा नुकताच कोची येथे मृत्यू झाला. अशी माहीती पोलिसांनी दिली.

शॉरमा हे मध्य पूर्वेतील एक लोकप्रिय स्ट्रीट फूड आहे, ज्याची भारतातील दक्षिणेकडील राज्यांमध्ये मोठी क्रेझ आहे.

मृत व्यक्तीचे नाव राहुल असे असून, तो कोट्टायम जिल्ह्यातील टीकोयचा रहिवासी आहे.

त्याच्या कुटुंबीयांच्या म्हणण्यानुसार, त्याने 18 ऑक्टोबर रोजी येथील एका हॉटेलमधून ऑनलाइन ऑर्डर केलेला शॉरमा खाल्ल्यानंतर त्याची तब्बेत बिघडली. रविवारपासून कोचीजवळील कक्कनाड येथील खासगी रुग्णालयात उपचार घेत असलेल्या या तरुणाचा अखेर मृत्यू झाला.

थ्रिक्काकारा पोलिसांनी सांगितले की, त्यांनी सोमवारी मावेलीपुरममधील हॉटेलविरुद्ध तरुणाच्या कुटुंबियांनी केलेल्या तक्रारीच्या आधारे गुन्हा दाखल केला आहे. तसेच दुसऱ्या दिवशी पालिका अधिकाऱ्यांनी हॉटेलवर कारवाई करत ते बंद केले.

एका पोलिस अधिकाऱ्याने सांगितले की, "पोस्टमॉर्टम रिपोर्ट मिळाल्यानंतरच शॉरमामुळे अन्नातून विषबाधा झाली की नाही हे आम्ही शोधू."

येकक्कनड येथील सनराईज हॉस्पिटलने जारी केलेल्या मेडिकल बुलेटिनमध्ये म्हटले आहे की, रविवारी सकाळी 10.30 च्या सुमारास संबंधीत तरुणाला रुग्णालयात दाखल करण्यात आले.

त्याला 19 ऑक्टोबरपासून सतत ताप येत होता. त्याच्यावर मल्टी-डिसिप्लिनरी पथकाकडून उपचार सुरू होते.

रुग्णामध्ये सेप्टीसेमिया आणि मल्टी-ऑर्गन डिसफंक्शन सिंड्रोम सारखी गंभीर लक्षणे दिसून आली. आमच्या प्रयत्नांनंतरही, रुग्णाची प्रकृती खालावली आणि 25 ऑक्टोबर रोजी दुपारी 2.55 वाजता त्याला मृत घोषित करण्यात आले.

अन्न सुरक्षा विभाग आणि पोलिसांच्या फॉरेन्सिक विभागाने हॉटेलची संयुक्त तपासणी केली असली तरी त्या दिवशी तयार केलेल्या शॉरमाचा नमुना त्यांना गोळा करता आला नाही.

हॉटेलमधील खाद्यपदार्थाचा नमुना तपासणीसाठी पाठवण्यात आला आहे. आरोग्य मंत्री वीणा जॉर्ज यांनी तातडीने अहवाल सादर करण्याचे निर्देश संबंधित अधिकाऱ्यांना दिले आहेत.