बंगळूर: प्रेयसीकडून २.५७ कोटी रुपये उकळल्या प्रकरणी पोलिसांनी बंगळूरमधल्या एका तरुणाला अटक केली आहे. पोलिसांनी दिलेली माहितीनुसार मोहन कुमार असे या आरोपीचे नाव असून २२ वर्षीय तरुणाने पैसे न दिल्यास प्रेयसीला खासगी फोटो आणि व्हिडीओ लीक करण्याची धमकी दिली होती. सध्य पोलिसांनी या आरोपीकडून ८० लाख रुपये जप्त केले आहेत.

आरोपी आणि त्याची प्रेयसी एकाच वर्गात शिकत होते, दरम्यान त्यांच्यामध्ये प्रेमसंबंध निर्माण झाले. आरोपी आणि पीडिता अनेकवेळा सोबत डेटवर जायचे आणि यावेळी त्यांच्यात घडलेले शारीरिक संबंध आरोपीने रेकॉर्ड करून ठेवले.

आरोपीने लग्नाचे आश्वासन देऊन हे फोटो आणि व्हिडीओ खासगी ठेवण्याचे वचन दिले होते. मात्र काही दिवसांतच आरोपीने त्याच्या प्रेयसीला पैशांची मागणी करत धमकवायला सुरुवात केली.

घाबरलेल्या तरुणीने आरोपीला २.५७ कोटी रुपये दिले, याशिवाय त्याने पीडित तरुणीकडून आलिशान कार, महागडी घड्याळे आणि दागिने देखील उकळले होते. रोजरोजच्या या मागणीला कंटाळून शेवटी तरुणीने पोलिसांकडे तक्रार दाखल केली, पोलिसांनी आत्तापर्यंत ८० लाख रुपये जप्त केले असून पुढील तपास सुरु आहे.