नवी दिल्ली: केंद्रीय अर्थमंत्री निर्मला सीतारमण यांनी रविवारी सलग नवव्यांदा केंद्रीय अर्थसंकल्प सादर केला. अर्थसंकल्पात सर्वसामान्य नागरिक, उद्योगजगत तसेच निर्यातीसाठी महत्त्वाच्या ठरणाऱ्या अनेक घोषणा करण्यात आल्या आहेत. या अर्थसंकल्पातील दिलासादायक बाब म्हणजे चामड्याचे बूट, कपडे आणि त्यांचा निर्यात खर्च कमी होणार आहे. यासोबतच मायक्रोवेव्ह ओव्हन, सौरऊर्जेशी संबंधित साहित्य, कर्करोगावरील काही औषधेही स्वस्त होणार आहेत.

मात्र दुसरीकडे, दारू महाग होण्याचे संकेत या अर्थसंकल्पातून मिळाले आहेत. तसेच खनिजे, स्क्रॅप आणि लक्झरी वस्तूंवरील खर्चात वाढ होणार आहे. १ एप्रिल २०२६ पासून नवीन आयकर कायदा लागू होणार असला, तरी यंदाच्या अर्थसंकल्पात करसवलतीबाबत कोणतीही मोठी घोषणा करण्यात आलेली नाही.

अर्थसंकल्पात शेती, संरक्षण, पायाभूत सुविधा आणि हरित ऊर्जेला प्राधान्य देण्यात आले असून, ‘विकसित भारत २०४७’ या दीर्घकालीन उद्दिष्टाकडे वाटचाल करण्यासाठी हा अर्थसंकल्प महत्त्वाचा मानला जात आहे. अमेरिका टॅरिफ धोरणांमुळे निर्माण झालेली जागतिक अनिश्चितता लक्षात घेता, हा अर्थसंकल्प विशेष ठरतो.

काय महाग होणार?

खनिजे, स्क्रॅप, मद्य, लक्झरी घड्याळे व लक्झरी वस्तू.

काय स्वस्त होणार?

चामड्याचे बूट, कपडे, सिंथेटिक फुटवेअर, परदेश प्रवासाशी संबंधित काही बाबी, कर्करोगावरील १७ औषधे, मायक्रोवेव्ह ओव्हन, विमाननिर्मितीशी संबंधित साहित्य, ई-व्ही बॅटऱ्या, मधुमेहावरील औषधे, बायोगॅस मिश्रित सीएनजी, सोलर ग्लास तसेच विमानांचे इंधन.

एकूणच, काही वर्गांना दिलासा देणारा तर काही घटकांसाठी खर्च वाढवणारा असा हा अर्थसंकल्प ठरला आहे.