रशिया आणि युक्रेन (Russia-Ukraine) यांच्यातील तणावाची परिस्थिती आता युद्धात बदलली आहे. रशियाचे अध्यक्ष व्लादिमीर पुतिन (Vladimir Putin) यांनी युक्रेनवर युद्धाची घोषणा केली. वृत्तानुसार, रशियाने युक्रेनच्या राजधानी कीवसह खार्किव, मोल्दोव्हा आणि चिसिनोसह 11 शहरांवर हल्ले केले आहेत. रशियाने केलेल्या हल्ल्यात आतापर्यंत 300 लोक मारले गेल्याचा दावा युक्रेनने केला आहे. रशिया आणि युक्रेनमध्ये सुरू झालेल्या या युद्धावर अमेरिकेसह जगातील सर्व देशांच्या नजरा लागल्या आहेत. उभय देशांमध्‍ये सुरू असलेले युध्‍द हा व्‍यवसायाच्या दृष्‍टीनेही संपूर्ण जगासाठी चिंतेचा विषय आहे. भारत (India) आणि युक्रेनमध्ये मजबूत व्यापारी संबंध आहेत, परंतु या युद्धामुळे दोन्ही देशांच्या व्यापार संबंधांवर वाईट परिणाम होण्याची शक्यता आहे हे नक्की. (Russia-Ukraine Impact: Inflation will rise in all countries of world including India)

भारत आणि युक्रेनमध्ये अनेक महत्त्वाच्या गोष्टींचा व्यापार आहे

भारत युक्रेनसह सर्व युरोपीय देशांना औषधी, बॉयलर मशिनरी, यांत्रिक उपकरणे, तेलबिया, फळे, कॉफी, चहा, मसाले यांसह अनेक महत्त्वाच्या गोष्टींची मोठ्या प्रमाणावर निर्यात करतो. दुसरीकडे, भारत युक्रेनमधून सूर्यफूल तेल, लोह, पोलाद, प्लास्टिक, रसायने, अजैविक रसायने, प्राणी, वेजिटेबल फैट आणि तेल यासारख्या वस्तू आयात करतो. रशिया आणि युक्रेनमधील युद्धामुळे केवळ भारताच्या युक्रेनमधील व्यापारावर परिणाम होणार नाही, तर युक्रेनमधून येणाऱ्या मालाच्या पुरवठ्यावरही परिणाम होणार हे निश्चित आहे. त्यामुळे युक्रेनमधून येणाऱ्या अनेक महत्त्वाच्या वस्तूंच्या पुरवठ्यावर परिणाम होत असल्याने त्यांच्या किमती वाढणार हे जवळपास निश्चित झाले आहे.

भारत युक्रेनसाठी 15 वी सर्वात मोठी निर्यात बाजारपेठ आहे

UN कॉमट्रेड डेटानुसार, 2020 मध्ये, भारत युक्रेनसाठी 15 वी सर्वात मोठी निर्यात बाजारपेठ होती आणि फार्मास्युटिकल उत्पादनांसाठी दुसरी सर्वात मोठी आयात बाजारपेठ होती. दुसरीकडे, युक्रेन ही भारतासाठी 23वी सर्वात मोठी निर्यात बाजारपेठ आहे आणि 30वी सर्वात मोठी आयात बाजारपेठ आहे. एकूणच, भारत आणि युक्रेनमध्ये कोट्यवधी डॉलर्सचा व्यापार आहे, ज्यावर युद्धाचा विपरीत परिणाम होईल आणि अनेक गोष्टींच्या किमतीही वाढतील. या दृष्टिकोनातून पाहिले तर रशिया आणि युक्रेनमधील युद्धाचा परिणाम केवळ रशिया आणि युक्रेनवरच नाही तर भारतासह जगातील सर्व देशांवर होणार आहे.