Nitin Gadkari Latest News: केंद्रीय मंत्री नितीन गडकरी यांनी एक्स्प्रेस वे वरुन प्रवास करणाऱ्यांसाठी आनंदाची बातमी दिली आहे. आता कार आणि बाईक चालवणाऱ्यांसाठी सरकारकडून मोठी योजना आखली जात आहे. नितीन गडकरी यांनी जाहीर केले की, 'फेब्रुवारीच्या अखेरीस बंगळूरु-म्हैसूर द्रुतगती मार्गाचे उद्घाटन केले जाईल. बंगळूरु-म्हैसूर एक्स्प्रेस वेवरुन दोन शहरांमधील प्रवासाचा वेळ 90 मिनिटे असेल.' यावेळी किमान 3 तास लागतात.

4,473 कोटी रुपये खर्च होणार आहेत

पत्रकारांशी बोलताना गडकरी म्हणाले की, 'उद्घाटनासाठी पंतप्रधान नरेंद्र मोदी (Prime Minister Narendra Modi) किंवा राष्ट्रपती द्रौपदी मुर्मू यांना आमंत्रित केले जाईल. या एक्स्प्रेस वे मुळे म्हैसूर, श्रीरंगपटना येथील पर्यटनाचा विकास होईल. त्याचबरोबर आयटी उद्योगालाही चालना मिळेल.' 4,473 कोटी रुपये खर्चून बांधण्यात येणाऱ्या 118 किलोमीटर लांबीच्या 10-लेन महामार्गाचीही त्यांनी पाहणी केली.

38 किमी अंतर कमी होईल

याशिवाय, बंगळूरु-चेन्नई एक्स्प्रेस वे चे उद्घाटन जानेवारी 2024 पर्यंत होणार आहे. चेन्नई (Chennai) आणि बंगळूरु ही देशातील सर्वात महत्त्वाची मेट्रो शहरे असल्याचे गडकरींनी म्हटले आहे. एक्सप्रेसवे हे अंतर 38 किमीने कमी करते. त्याचबरोबर प्रवासाचा वेळ पाच तासांवरुन 2.15 तासांवर आणतो. यामुळे लॉजिस्टिक्सचा खर्चही चार ते सहा टक्क्यांनी कमी होईल.

डबल डेकर बस सुरु करण्याचीही योजना

ते पुढे म्हणाले की, 'कर्नाटक हे एक महत्त्वाचे राज्य असून बंगळूरुमधील वाहतूक कोंडी कमी करण्याचा आम्ही विचार करत आहोत. तसेच 200 लोकांची क्षमता असलेली डबल डेकर स्काय बस सुरु करण्याचा विचार केला जाणार आहे.' याबाबत मुख्यमंत्री बसवराज बोम्मई यांच्याशीही मी चर्चा केली असल्याचे गडकरींनी यावेळी म्हटले.