देशातील कोरोनाचं सावट काहीसं ओसरलं असलं तरी महागाईचा भडका दिवसेंदिवस वाढूच लागला आहे. यातच आता गॅस सिलिंडरच्या वाढलेल्या किमतीचा फटकाही जनतेला बसू लागला आहे. राष्ट्रीय तेल कंपन्यांनी गॅस सिलिंडरच्या (Gas Cylinder) किमतीत वाढ केल्याची माहिती मिळत आहे. 1 मार्च 2022 पासून कॉमर्शियल गॅस घेणाऱ्यांना अधिक किंमत मोजावी लागणार आहे. (LPG Cylinders Will Be Expensive Again From March 1 2022)

दरम्यान, एएनआय या वृत्तसंस्थेनुसार, छोट्या आणि मोठ्या आकाराच्या कॉमर्शियल गॅस सिलिंडरच्या किमतीत वाढ झाली आहे. त्यामुळे आता सुधारित किमतींनुसार राजधानी दिल्लीत 19 किलोचा एलपीजी सिलिंडर 105 रुपयांनी महागला आहे. त्याच वेळी, कोलकातामध्ये त्याची किंमत 108 रुपयांनी वाढली आहे. दिल्लीत आता 19 किलोच्या सिलेंडरसाठी 2,012 रुपये मोजावे लागणार आहेत. 5 किलोच्या एलपीजी सिलिंडरच्या दरातही 27 रुपयांनी वाढ करण्यात आली आहे. आता राजधानीत व्यावसायिक ग्राहकांसाठी या सिलिंडरची किंमत 569 रुपयांवर गेली आहे. या नवीनतम किंमती आजपासून लागू होतील.

तसेच, घरगुती गॅस सिलिंडरच्या दरात कोणताही बदल करण्यात आलेला नाही. घरगुती सिलिंडर जुन्या किमतीतच मिळणार आहेत. गेल्या महिन्यातील कपातीनंतर या महिन्यातील वाढीमुळे हिशेबांची बरोबरी झाली आहे. 1 फेब्रुवारी 2022 रोजी तेल कंपन्यांनी कॉमर्शियल गॅस सिलिंडरच्या किंमतीत 91.50 रुपयांची कपात केली होती, त्यानंतर दिल्लीत 19 किलोच्या कॉमर्शियल गॅस सिलिंडरची किंमत 1907 रुपयांवर गेली होती. देशात दर महिन्याला गॅस सिलिंडरच्या किमती बदलल्या जातात.