Income Tax: अर्थ मंत्रालयाकडून मोठी अपडेट समोर येत आहे. यामुळे करदात्यांना मोठा दिलासा मिळणार आहे.

केंद्रीय माध्यमिक शिक्षण मंडळाला (CBSE) परीक्षा शुल्क, पाठ्यपुस्तकांची विक्री आणि प्रकाशन आणि इतर कामांमधून मिळणाऱ्या उत्पन्नावर आयकरातून (Income Tax) सूट देण्यात आल्याची माहिती अर्थ मंत्रालयाने दिली आहे.

CBSE ला मागील तारखेपासून आयकर सूट मिळाली आहे. ही सूट 2020-21 या आर्थिक वर्षासाठी (1 जून 2020 ते 31 मार्च 2021) आणि 2021-22 आणि 2022-23 या आर्थिक वर्षांसाठी देण्यात आली आहे. चालू आर्थिक वर्ष आणि पुढील आर्थिक वर्ष 2024-25 मध्येही ही सूट कायम राहील.

सीबीडीटीने अधिसूचना जारी केली

सेंट्रल बोर्ड ऑफ डायरेक्ट टॅक्सेस (CBDT) ने एका अधिसूचनेत म्हटले आहे की, सरकारने दिल्ली स्थित केंद्रीय माध्यमिक शिक्षण मंडळाला आयकर कायद्याच्या कलम 10(46) अंतर्गत अधिसूचित केले आहे आणि त्याच्या मूल्यांकन केलेल्या उत्पन्नावर (Income) आयकर भरण्यापासून सूट दिली आहे. केंद्र सरकारने CBSE ची स्थापना केली आहे.

परिक्षा शुल्क

अशा उत्पन्नामध्ये परीक्षा शुल्क, CBSE शी संबंधित शुल्क, पाठ्यपुस्तके आणि प्रकाशनांची विक्री, नोंदणी शुल्क, क्रीडा शुल्क आणि प्रशिक्षण शुल्क यांचा समावेश होतो. याशिवाय, CBSE प्रकल्प/कार्यक्रमांमधून मिळालेली रक्कम, आयकर परताव्यावरचे व्याज आणि अशा उत्पन्नावर मिळालेले व्याज आयकरातून मुक्त असेल.

करमुक्तीसाठी काय अट आहे

CBDT नुसार, कर सवलत या अटीच्या अधीन आहे की, CBSE कोणत्याही व्यावसायिक क्रियाकलापांमध्ये गुंतणार नाही आणि विहित उत्पन्नाचे स्वरुप संपूर्ण आर्थिक वर्षात बदलणार नाही.

आयकर विवरणपत्रात लाभ मिळेल

एएमआरजी अँड असोसिएट्सचे संयुक्त भागीदार (कॉर्पोरेट आणि आंतरराष्ट्रीय कर) ओम राजपुरोहित यांनी सांगितले की, सध्याची अधिसूचना मर्यादित कालावधीसाठी आहे. ही अंतिम तारीख 1 जून 2020 ते आर्थिक वर्ष 2024-25 पर्यंत आहे.

हे पाहता, CBSE मागील वर्षांच्या आयकर विवरणपत्रांमध्ये सुधारणा करण्यासाठी आणि मूल्यांकन केलेल्या उत्पन्नावर भरलेल्या कराच्या 'परताव्या'साठी CBDT कडे विशेष परवानगीसाठी अर्ज करु शकते.