Indian Railway: रेल्वेकडून सर्वसामान्यांना अनेक प्रकारच्या सुविधा दिल्या जातात. आता रेल्वेने गरीब लोकांसाठी मोठा निर्णय घेतला आहे. तुम्हीही गरीब असाल आणि ट्रेनमध्ये प्रवास करत असाल तर भारतीय रेल्वेने एक खास योजना सुरु केली आहे.

वंदे भारत एक्स्प्रेस सध्या देशभरात धावत आहे, मात्र तिकीट खूप महाग असल्याने गरीब लोकांना या ट्रेनमधून प्रवास करता येत नाही, त्यामुळे आता रेल्वेने गरिबांसाठी एक योजना सुरु केली आहे. वेगळ्या प्रकारच्या वंदे भारत चालवा, जेणेकरुन गरीब लोकही अशा सुविधांचा लाभ घेऊ शकतील, अशी मागणी करण्यात येत होती.

ही ट्रेन नॉन एसी असेल

सध्या देशाची प्रीमियम ट्रेन वंदे भारत एक्स्प्रेस आहे, मात्र आता रेल्वे सर्वसामान्यांसाठी सामान्य वंदे भारत एक्सप्रेस चालवण्याचा निर्णय घेत आहे. ही नॉन एसी ट्रेन असेल, ज्याचे भाडेही खूप कमी असेल. यासोबतच वंदे भारत ट्रेनप्रमाणेच सुविधाही असतील.

ट्रेनचे नाव काय असू शकते?

मीडिया रिपोर्ट्सनुसार, ट्रेनचे नाव अद्याप निश्चित झालेले नाही. पण सूत्रांनी दिलेल्या माहितीनुसार, या ट्रेनचे नाव वंदे भारतच्या धर्तीवर असू शकते. सध्या याबाबत कोणतेही अधिकृत वक्तव्य जारी करण्यात आलेले नाही.

2024 पर्यंत सामान्य वंदे भारत येऊ शकेल

सूत्रांनी दिलेल्या माहितीनुसार, वंदे भारतच्या या आवृत्तीवर चेन्नईतील (Chennai) इंटिग्रल कोच फॅक्टरीमध्ये काम सुरु झाले असून जानेवारी 2024 पर्यंत धावण्याची शक्यता आहे. ही ट्रेन चेअर कारची असेल आणि नंतर ती स्लीपर कारचीही बनवली जाईल. साहजिकच यामध्ये कमी भाडे आकारले जाईल.

स्लीपर वंदे भारत ट्रेन

वंदे भारत ट्रेन ही सेमी हाय स्पीड ट्रेन आहे. आतापर्यंत रेल्वेने चेअरकार वंदे भारत एक्सप्रेस सुरु केली आहे आणि लवकरच स्लीपर वंदे भारत चालवण्याची रेल्वेची योजना आहे. स्लीपर वंदे भारत ट्रेनची ऑर्डरही देण्यात आली आहे, जी दूरच्या प्रवासासाठी सुरु करता येईल.