Emergency: 'संजय गांधीं'चा फर्स्ट लूक रिलीज, साऊथचा अभिनेता साकारणार दमदार भूमिका

Sanjay Gandhi Emergency Look: बॉलिवूड अभिनेत्री कंगना राणौत लवकरच 'इमर्जन्सी' चित्रपटात दिसणार आहे. कंगनाचा 'इमर्जन्सी' हा चित्रपट सतत चर्चेत असतो. दरम्यान, निर्मात्यांनी 'इमर्जन्सी'मधील संजय गांधींचा फर्स्ट लूक रिलीज केला आहे. या चित्रपटात दिवंगत नेते संजय गांधी यांची भूमिका दक्षिणेतील अभिनेता विशाक नायर साकारत आहे.

बॉलिवूड अभिनेत्री कंगना राणौत तिच्या आगामी 'इमर्जन्सी' चित्रपटामुळे गेल्या अनेक दिवसांपासून चर्चेत आहे. आता कंगनाने 'इमर्जन्सी' चित्रपटातील आणखी एका पात्राचा लूक शेअर केला आहे. या पोस्टरमध्ये दाक्षिणात्य अभिनेता विशाक नायर संजय गांधींच्या भूमिकेत दिसत आहे. पोस्टरमध्ये अभिनेता विशाकचा लूक संजय गांधींसारखा दिसत आहे.

संजय गांधींचा फर्स्ट लूक शेअर करताना कंगना राणौतने इंस्टाग्रामवर या पोस्टला कॅप्शनही लिहिलं आहे. अभिनेत्रीने कॅप्शनमध्ये लिहिले- 'प्रतिभेच्या पॉवरहाऊसची ओळख करून देत आहोत, संजय गांधी, संजय इंदिराजींचा आत्मा होता आणि इंदिराजींनी त्यांना सर्वात जास्त प्रेम दिले आणि सर्वात मोठे नुकसान त्यांचे झाले.'

विशाक नायर हा साऊथ सिनेमातील तरुण कलाकारांपैकी एक आहे. त्याचबरोबर अनुपम खेर, कंगना राणौत, श्रेयस तळपदे, मिलिंद सोमण आणि महिमा चौधरी यांचा लूकही 'इमर्जन्सी' चित्रपटातून समोर आला आहे. 'इमर्जन्सी' चित्रपटाची कथा इंदिरा गांधींनी 1975 साली लादलेल्या 'आणीबाणी'वर आधारित आहे.