मुन्नाभाई बनला अरुणाचल प्रदेशचा ब्रँड अ‍ॅम्बेसेडर

भारतीय जनता पक्ष (BJP) च्या नेतृत्वाखालील अरुणाचल प्रदेश सरकारने बॉलीवूड (Bollywood) अभिनेता संजय दत्तची (Sanjay Dutt) राज्याचा ब्रँड अ‍ॅम्बेसेडर म्हणून नियुक्ती केली आहे. संजय दत्त व्यतिरिक्त, सरकारने पुरस्कार विजेते चित्रपट निर्माता आणि ब्रँडिंग तज्ञ राहुल मित्रा (Rahul Mittra) यांना ब्रँड सल्लागार म्हणून नियुक्त केले आहे. मुख्यमंत्री पेमा खांडू आणि विधानसभेचे अध्यक्ष पासंग सोना यांनी संजय दत्त आणि राहुल मित्रा यांच्या उपस्थितीत राज्याच्या नामकरणाच्या 50 व्या वर्षाच्या सुवर्णमहोत्सवाच्या मुहूर्तावर ही घोषणा केली.

या समारंभाला उपस्थित राहण्यासाठी, संजय दत्त आणि राहुल मित्रा प्रथम मुंबईहून चार्टर्ड फ्लाइटने दिब्रुगढला पोहोचले, त्यानंतर तेथून हेलिकॉप्टरने मेचुकाच्या नयनरम्य खोऱ्यात पोहोचले, जिथे सुवर्णमहोत्सवी सोहळा आयोजित करण्यात आला होता. राहुल मित्रा फिल्म्स द्वारे संकल्पित, अंमलात आणलेले आणि टॉप एड फिल्ममेकर आणि ड्रमर शिराझ भट्टाचार्य यांनी चित्रित केलेले एक विशाल मीडिया मोहीम सुरू करण्यात आली. ज्यामध्ये संजय दत्तला युवा आयकॉन, निसर्गप्रेमी, व्यसनमुक्तीचा समर्थक म्हणून सादर केले गेले.

अनेक अॅड फिल्म्सच्या माध्यमातून तरुणाईला जागरूक करणार

अरुणाचल प्रदेश पर्यटकांसाठी संजय दत्त राज्यातील तरुणांसोबत व्यसनमुक्ती मोहीम आणि राज्यात असलेल्या अनेक प्रमुख समस्यांबाबत पुढाकार घेतील. राज्यातील जीरो गाव, पक्के घाटी, दंबुक, नामसाई, परशुराम कुंड, पासीघाट, मेचुका आणि तवांग येथे अशा जाहिरातींचे चित्रीकरण मोठ्या प्रमाणावर होत आहे.

सुमारे महिनाभर चाललेल्या या विशेष महोत्सवाची सुरुवात जीरो गावापासून 20 जानेवारी 2022 रोजी होणार आहे, तर समारोप समारंभ 20 फेब्रुवारी रोजी राज्याच्या स्थापना दिनानिमित्त इटानगर येथे होणार आहे. त्याचबरोबर अभिनेता संजय दत्तला राज्याचा ब्रँड अॅम्बेसेडर बनवण्यात आल्याने खूप आनंद झाला आहे. राहुल मित्रासोबतचा स्वतःचा एक फोटो शेअर करत त्यांनी अरुणाचल प्रदेश सरकार आणि मुख्यमंत्री पेमा खांडू यांचे आभार मानले आहेत. अरुणाचल प्रदेशचा ब्रँड अॅम्बेसेडर बनल्याबद्दल संजय दत्तचे मित्र आणि चाहते अभिनंदन करणाऱ्या पोस्टवर प्रतिक्रिया देत आहेत.