सीमा पार रणवीरची एन्ट्री! कराचीच्या रस्त्यांवर केलं गुपचूप शूटिंग, पाकिस्तानी नागरिक झालेत 'येडे'; केला अजब दावा Watch Video

बॉलीवूडचे चित्रपट आणि त्यातील भव्यता नेहमीच चर्चेचा विषय ठरते. मात्र, सध्या एका आगामी चित्रपटाने चक्क सीमेपलीकडे पाकिस्तानात मोठी खळबळ उडवून दिली आहे. दिग्दर्शक आदित्य धर यांचा आगामी चित्रपट ‘धुरंधर-२’ (Dhurandhar) मधील काही दृश्ये पाहून एका पाकिस्तानी तरुणाने असा काही दावा केला आहे, जो ऐकून भारतीय नेटकरी आपले हसू रोखू शकत नाहीत. या तरुणाच्या मते, रणवीर सिंहने चक्क कराचीच्या गल्ल्यांमध्ये येऊन गुपचूप शूटिंग उरकले आहे!

चित्रपटाच्या तांत्रिक कौशल्याचा हा एक उत्तम नमुनाच म्हणावा लागेल की, ‘धुरंधर’च्या मेकर्सनी कराचीमधील 'ल्यारी' या भागाचा हुबेहूब सेट थायलंडमधील बँकॉक येथे उभारला होता. चित्रपटात हा भाग इतका वास्तववादी दिसला की, पाकिस्तानातील लोकांना वाटू लागले की त्यांच्याच शहरात चित्रीकरण झाले आहे. विशेषतः ल्यारीमधील प्रसिद्ध 'चील चौक' पडद्यावर पाहून तिथल्या एका तरुणाचा पारा चढला आणि त्याने थेट सोशल मीडियावर एक व्हिडिओ शेअर करत अजब खुलासे केले.

"रणवीर पहाटे ४ वाजता यायचा..." तरुणाचा अजब दावा

व्हायरल होत असलेल्या व्हिडिओमध्ये हा तरुण अत्यंत गंभीरपणे सांगत आहे की, आदित्य धर आणि रणवीर सिंह आपली संपूर्ण टीम घेऊन पहाटे ४ वाजता ल्यारीमध्ये येत असत. त्याचे कारण सांगताना तो म्हणतो की, "तेव्हा लोक झोपलेले असायचे, म्हणून कोणाला कळले नाही." इतकेच नाही तर, तिथल्या काही वृद्धांनी रणवीरला प्रत्यक्षात शूटिंग करताना पाहिले असल्याचा दावाही त्याने केला आहे. पुढे त्याने धमकीवजा इशारा दिला की, "जर ही टीम रात्री १० वाजता आली असती, तर आम्ही त्यांना सोडले नसते." या तरुणाचा लॉजिक आणि त्याचा आत्मविश्वास पाहून नेटकऱ्यांनी त्याची चांगलीच फिरकी घेतली आहे.

भारतीय नेटकऱ्यांकडून 'फुल' मनोरंजन

हा व्हिडिओ @choga_don या एक्स (ट्विटर) हँडलवरून व्हायरल होताच भारतीयांनी कमेंट्सचा पाऊस पाडला आहे. "भावा, थोडी कमी घेत जा!" अशा उपहासात्मक कमेंट्ससह लोक या तरुणाच्या अज्ञानाची मजा घेत आहेत. "बँकॉकला कराची समजणे हेच आदित्य धर यांच्या दिग्दर्शनाचे मोठे यश आहे," असे मत काही युजर्सनी मांडले आहे. एकूणच, चित्रपटाचा ट्रेलर किंवा सीन्स येण्यापूर्वीच या पाकिस्तानी तरुणाच्या दाव्याने 'धुरंधर'ची जोरदार चर्चा सुरू झाली आहे.