Brahmastra OTT Release: 'या' दिवशी डिस्नी प्लस हॉटस्टारवर येणार 'ब्रह्मास्त्र'

Brahmastra OTT: बॉक्सऑफिसवर चांगली कामगिरी केलेला या वर्षातील ब्लॉकबस्टर चित्रपट 'ब्रह्मास्त्र' आता ओटीटीवर येणार आहे. रविवारी या चित्रपटाची ओटीटी रीलीज डेट जाहीर करण्यात आली. दिग्दर्शक अयान मुखर्जी याने ही डेट जाहीर केली.

रणबीर कपूर, आलिया भट्ट, अमिताभ बच्चन, मौनी रॉय आणि नागार्जून यांच्या प्रमुख भुमिका असलेला हा चित्रपट डिस्नी प्लस हॉटस्टारवर स्ट्रीम होणार आहे. रविवारी डिस्नी प्लस हॉटस्टानेही त्यांच्या अधिकृत इन्स्टाग्राम हँडलवर पोस्ट शेअर करून ही माहिती दिली.

4 नोव्हेंबर रोजी हा चित्रपट ओटीटीवर प्रदर्शित होत आहे. हीच पोस्ट चित्रपटाचा निर्माता करन जोहरनेही शेअर केली आहे. करनने त्याच्या पोस्टमध्ये म्हटेल आहे की, मोठ्या पडद्यापासून ते तुमच्या हृदयापर्यंत आणि तुमच्या स्क्रीनवर या वर्षीचा सर्वात मोठा हिट चित्रपट ब्रम्हास्त्र ओटीटी रीलीजसाठी पुर्णतः सज्ज आहे.

हा चित्रपट तीन भागात येणार असून 'ब्रह्मास्त्र' हा पहिला भाग आहे. आणखी दोन भाग आगामी वर्षांमध्ये येणार आहे. दरम्यान, या चित्रपटातील शाहरूख खानच्या कॅमियोची देखील खूप चर्चा झाली होती. शिवाय शाहरूखने साकारलेल्या भूमिकेचा स्पिन ऑफ (स्वतंत्र चित्रपट) यावा अशी मागणी अनेक चाहत्यांनी केली होती.

खरे तर हे वर्ष अनेक बड्या हिंदी चित्रपटांसाठी अत्यंत वाईट ठरले होते. आमिर खानचा 'लाल सिंग चढ्ढा', अक्षयकुमारचा 'पृथ्वीराज' हे चित्रपट बॉक्सऑफिसवर सपशेल आपटले होते. त्यामुळे 'ब्रह्मास्त्र'वरही अपयशाचे सावट होते. तथापि, 'ब्रह्मास्त्र'ने देशभरात 250 कोटी रूपये तर जगभरातून 400 कोटी रूपयांहून अधिक कमाई केली आहे. 'ब्रह्मास्त्र' शिवाय 'द काश्मीर फाइल्स' आणि 'भूल भुलैया 2' हे देखील यावर्षीचे सुपरहिट चित्रपट आहेत.