सोशल मीडियावरील Haldi Trend धोक्याचा? 'मजा ठरेल कायमची सजा' ज्योतिषांचा गंभीर इशारा; Video Viral

Haldi Trend Viral Video: सध्या सोशल मीडियावर 'हळदीच्या पाण्याचा ट्रेंड' (Haldi Water Trend) मोठ्या प्रमाणात व्हायरल होत आहे. एका काचेच्या ग्लासमध्ये पाणी घेऊन त्यात हळद टाकणे आणि नंतर तो ग्लास मोबाईलच्या टॉर्चलाइटवर ठेवून अंधाऱ्या खोलीत हळदीचा पाण्यात हळूहळू खाली उतरण्याचा जादुई अनुभव घेण्याचे रील्स अनेक जण बनवत आहेत.

लहान मुलांपासून मोठ्यांपर्यंत अनेक जण हा ट्रेंड फॉलो करत असल्याने, 'भारतातली हळद बहुतेक अशीच संपणार' असे उपहासात्मक विनोदही फिरत आहेत. मात्र, या मनोरंजक वाटणाऱ्या ट्रेंडवर एका ज्योतिषाने गंभीर आक्षेप घेतला असून, लोकांना तातडीने सावध राहण्याचा इशारा दिला आहे. हा केवळ एक ट्रेंड नसून, यामुळे नकारात्मक शक्तींना आमंत्रण देत असल्याचा दावा त्यांनी केलाय.

'नकारात्मक शक्तींना आमंत्रण'

ज्योतिषी अरुण कुमार व्यास यांनी या 'हळदीच्या ट्रेंड'वर तीव्र नाराजी व्यक्त केली आहे. ते सांगतात, "हळदीचा हा ट्रेंड एक नकारात्मक प्रक्रिया आहे. व्यास यांच्या मते, रात्रीच्या अंधारात हा ट्रेंड करून पाहिल्याने नकारात्मक शक्ती तुमच्याकडे आणि तुमच्या घरात आकर्षित होऊ शकतात.

यामुळे शारीरिक, मानसिक किंवा आर्थिक नुकसान होण्याची शक्यताही टाळता येत नाही, असे त्यांनी म्हटले आहे. अशा पद्धतीने हळद पाण्यात टाकल्याने तुमच्या जन्मकुंडलीतील चंद्र आणि गुरुचे बळ कमी होऊ शकते, ज्यामुळे नशिबावर वाईट परिणाम होतो आणि मानसिक स्थिती बिघडू शकते, असा दावा त्यांनी केला.

व्यास यांच्या मते, ही पूर्णपणे हानिकारक प्रक्रिया आहे, जी घरात आपत्ती आणू शकते. त्यामुळे अशा गोष्टी टाळल्या पाहिजेत. सोशल मीडियावरील क्षणिक प्रसिद्धी किंवा मनोरंजनासाठी कोणतेही ट्रेंड फॉलो करण्याआधी, त्यांचे संभाव्य परिणाम विचारात घेणे महत्त्वाचे आहे, असा संदेश ज्योतिषांच्या या इशाऱ्यातून दिलाय.

(या लेखात नमूद केलेले उपाय/फायदे/सल्ला आणि विधाने केवळ सामान्य माहितीसाठी आहेत. दैनिक गोमंतक या लेखातील वैशिष्ट्यांमध्ये लिहिलेल्या गोष्टींना समर्थन देत नाही किंवा याची पुष्टी करत नाही.)