एक काळ होता जेव्हा प्रेमात पडण्यासाठी नदीम-श्रवण आणि प्रेमभंग झाल्यावर दु:खावेळी सोबत करण्यासाठी अल्ताफ राजाची गाणी यायची. आपल्या मोकळ्या आवाजाने दर्दी लोकांचा दर्द अजुन वाढवणारे गायक म्हणजे अल्ताफ राजा.
प्रेमात पडलेल्या प्रत्येकाला ज्याच्या गाण्यांनी रिझवलं.. नादावलं आणि प्रेम मोडलेल्यांनाही ज्याच्या गाण्यांनी मोठा आधार दिला, असा गायक म्हणजे अल्ताफ राजा..
एक काळ असा होता की लोक अल्ताफ राजाच्या गाण्यावर दिवसरात्र झिंगत असयचे. 'तुम तो ठहरे परदेसी' , 'जा बेवफा जा', 'आज की रात ना जा परदेसी' अशी किती तरी गाणी लोकांच्या ओठांवर असायची, आणि आजही ती गाणी तितकीच लोकप्रिय आहेत.
'तुम तो ठहरे परदेसी' हे गाणं तर इतकं तुफान गाजलं की लोक या गाण्यासाठी वेडे झाले होते. अल्ताफ आणि त्यांच्या गाण्यांनी त्या काली अनेक रेकॉर्ड मोडले आहेत.
यशाच्या शिखरावर पोहोचलेल्या अल्ताफनं एकेकाळी कपडे शिवायचे काम केले आहे. त्याचाच किस्सा त्याने एका मुलाखतीत सांगितला आहे. अल्ताफ यांचा एक व्हिडिओ व्हायरल होत आहे. ज्यामध्ये ते आपल्या स्ट्रगल विषयी सांगत आहेत. ते म्हणतात की, ''मी नववी फेल आहे.. मी दहावी ही पास करू शकलो नाही. आईने त्यासाठी खूप प्रयत्न केले. प्रायव्हेट क्लास लावून मला दहावीत बसवलं पण मी काही पास झालो नाही.'
'पण माझे आई-वडील खूप चांगले होते. त्यांनी मला कधीही त्रास दिला नाही की सक्ती केली नाही. ते फक्त इतकेच म्हणायचे.. तू काहीतरी कर.. ते म्हणायचे, आम्ही आहोत तोवर ठीक आहे. पण आमच्या माघारी तुझं कसं होणार..'
'शेवटी त्यांनी मला दादर मध्ये टेलरिंग कॉलेज मध्ये पाठवलं.. जेणकरून काहीतरी कसब अंगी असावी. तिथे मी सगळं शिकलो. कपडे शिवू लागलो. अगदी त्यावेळी कपडा कापताना लागलेल्या कैचीचा व्रणही अजून माझ्या हातावर आहे.'
हा व्हिडिओ सध्या बराच व्हायरल होत आहे. अल्ताफ यांनी आजवर अनेक म्युझिक अल्बमसाठी आपला आवाज दिला आहे. मात्र, गेल्या काही काळात त्यांचा कलाविश्वातील वावर बराच कमी झाला आहे.
असं म्हणतात की सध्याचेही त्यांचे जीवन पहिल्या सारखे तारांकित राहिलेले नाही. आता ते अगदी सामान्य माणसासारखे आयुष्य जगत आहेत.अल्ताफ राजा यांची गाणी तरुणांच्या प्रेमभंगाच्या वेळी साथ देतील आणि दु:ख सुरेल होईल हे नक्की.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.