Maharashtra Weather Update: पश्चिम महाराष्ट्रात पावसासह गारपिटीची शक्यता

राज्यात गेल्या काही दिवसांपासून वातावरणात बदल होत आहेत. कोकण आणि मराठवाड्यात आज आणि उद्या पावसाच्या सारी बरसण्याचा अंदाज हवामान खात्याने दर्शवला आहे. पश्चिम महाराष्ट्रात सुद्धा पावसासह गारपिटी होण्याची शक्यता हवामान खात्याने दर्शवला आहे.. पश्चिम महाराष्ट्रामधील कोल्हापूर, सातारा, सांगली तर कोकणातील रत्नागिरी आणि सिंधुदुर्गमध्ये यलो अलर्ट देण्यात आला आहे. तर उत्तर भारतातील राजस्थान, गुजरात, झारखंड, मध्य प्रदेश या भागात गेल्या दीड ते दोन महिन्यापासून उष्णतेची लाट सुरु आहे.

कोकण, मराठवाड्यासह पश्चिम महाराष्ट्रात पावसाचा अंदाज दर्शविला तरी, विदर्भ आणि आजूबाजूच्या भागात तापमानाचा पारा कायम असणार असा अंदाज हवामान खात्याने व्यक्त केला आहे. तर गेल्या दीड महिन्यापासून उत्तर भारतातील राजस्थान, गुजरात, झारखंड, मध्य प्रदेश या भागात उष्णतेची लाट कायम आहे. या भागाकडून महाराष्ट्राकडे उष्ण वारे वाहत आहेत. तर, दक्षिणेकडून महाराष्ट्राकडे दमट वारे वाहत आहेत. या परिणाम म्हणून महाराष्ट्रामधील कोकण, मध्य महाराष्ट्र आणि मराठवाड्यात अवकाळी पाऊस पडण्याची शक्यता आहे. पुढील दोन दिवसांत 13 ते 14 एप्रिल दरम्यान या भागामध्ये वादळी वाऱ्यासह पाऊस पडण्याची शक्यता आहे. तर अनेक भागात गारा पडण्याची शक्यता आहे.

राज्यातील कोल्हापूर, सातारा आणि सांगली, रत्नागिरी, सिंधुदुर्ग या भागात विजांचा कडकडाटसह मुसळधार पाऊस पडण्याची शक्यता हवामान खात्याकडून देण्यात आला आहे. दरम्यान, पश्चिम महाराष्ट्रामधील सांगली, सातारा, सोलापूरच्या काही भागात अवकाळी पाऊस झाला. या पावसामुळे अनेक ठिकाणी पिकांचे नुकसान झाले असून आंबा, द्राक्ष फळबागांना मोठा फटका बसला आहे. त्यामुळे शेतकरी चिंतेत आहेत. तर काही ठिकाणी वादळी वारे आणि पावसामुळं घरे पडल्याच्या घटना देखील घडल्या आहेत.