Sindhudurg Crime : बलात्काराचा गुन्हा दाखल करण्याची दिली धमकी; पोलिस अधिकारी एसीबीच्या जाळ्यात

सिंधुदुर्गात लाच लुचपत विभागाच्या पथकाने पोलीस उपनिरिक्षकासह हवालदाराला रंगेहाथ पकडले. ही कारवाई गुरुवारी दुपारी साडेबारा वाजण्याच्या सुमारास केली. लाचलुचपच्या पथकाने सापळा रचत त्या दोघांना 20 हजार रुपयाची रोख रक्‍कम घेताना पकडले आहे.

दरम्यान, या कारवाईनंतर त्या दोघांच्या घरावर लाचलुचपतच्या पथकाने छापा टाकला असून त्यांच्या मालमत्तेसह कागदपत्रांची चौकशी सुरू आहे.

याबाबत अधिक माहिती अशी की, याप्रकरणी तक्रार देणाऱ्या तक्रारदाराला तुझ्या विरोधात बलात्काराचा गुन्हा दाखल करतो अशी धमकी देऊन, असे सांगून या दोघांनी त्यांच्याकडे 40 हजार रुपयाची मागणी केली होती. त्यातील 20 हजार रुपये आज देण्याचे ठरले होते.

त्यानुसार तक्रारदाराने सिंधुदुर्ग लाच लुचपत विभागाशी संपर्क साधून तक्रार केली. दरम्यान ठरल्यानुसार लाचलुचपच्या पथकाने या ठिकाणी सापळा रचला व त्या दोघांना 20 हजार रुपयांची रोख रक्‍कम घेताना रंगेहाथ पकडले. ही कारवाई आज दुपारी साडेबारा वाजण्याच्या सुमारास वैभववाडी येथे करण्यात आली.

लाच स्वीकारल्याप्रकरणी वैभववाडी पोलीस ठाण्याचे उपनिरीक्षक सुरज पाटील व हवालदार मारुती साखरे या दोघांना लाच लुचपत विभागाच्या पथकाने रंगेहाथ पकडले.

याप्रकरणी वैभववाडी पोलीस ठाण्यात दोघांविरुद्ध गुन्हा दाखल करण्यात आला. या कारवाईनंतर त्या दोघांच्या घरावर लाचलुचपतच्या पथकाने छापा टाकला असून त्यांच्या मालमत्तेसह कागदपत्रांची चौकशी सुरू आहे.