Guhagar Accident: गुहागर येथे दोन बसची समोरासमोर धडक, चालकांसह 25 ते 30 प्रवासी जखमी

रत्नागिरी जिल्ह्यातील गुहागर येथे (Guhagar, Ratnagiri) दोन बसची समोरासमोर धडक झाली आहे. या अपघातात चालकांसह 25 ते 30 प्रवासी जखमी झाले आहेत. जखमींमध्ये शाळकरी विद्यार्थ्यांचाही समावेश आहे. चिपळूण धोपावे बस आणि गुहागर डेपोची बस समोरासमोर धडकल्याने हा अपघात झाला. अवघड वळणार हा अपघात झाल्याची माहिती समोर आली आहे. गुहागर तालुक्यात आज (सोमवारी) सकाळी हा अपघात झाला.

मिळालेल्या माहितीनुसार, धोपावे-चिपळूण बस आणि गुहागर डेपोची बस विरुद्ध दिशेने येत होत्या. त्यावेळी एका अवघड वळणावर दोन्ही चालकांचं बसवरचे नियंत्रण सुटलं आणि बस एकमेकांवर आदळल्या. अपघातात बसच्या समोरील भागाचा चक्काचूर झाला आहे. दोन्ही बसमधील चालकांना गंभीर दुखापत झाली. तर दोन्ही बसमधील 25 ते 30 प्रवासी जखमी झाले आहेत.

बसच्या चालकांना RGPPL च्या रुग्णालयात दाखल केलं आहे. इतर जखमींवरही उपचार सुरु आहेत. मुसळधार पावसामुळे बचाव कार्यात अडथळे निर्माण होत आहे. गुहागर पोलीस आणि स्थानिक ग्रामस्थांच्या मदतीने बचाव कार्य सुरु आहे.