Sonali Phogat Case : सोनाली हत्या प्रकरणाचा तपास अखेर सीबीआयकडे सोपवणार

Sonali Phogat Case : सोनाली फोगट हत्या प्रकरणाचा तपास अखेर सीबीआयकडे सोपवण्यात येणार आहे. तसं पत्रच गोवा सरकार केद्राला पाठवणार असल्याची माहिती गोव्याचे मुख्यमंत्री डॉ. प्रमोद सावंत यांनी स्पष्ट केलं आहे. त्यामुळे आता सोनाली हत्या प्रकरणाच्या तपासाला आणखी गती येणार आहे.

सोनाली फोगट हत्या प्रकरणात अगदी सुरुवातीपासूनच सीबीआय तपासाची मागणी होत होती. आता मुख्यमंत्री डॉ. प्रमोद सावंत यांनी या प्रकरणाचा तपास सीबीआयकडे सोपवत असल्याची घोषणा केली आहे. लोकांनी आधीपासूनच हा तपास सीबीआयकडे सोपवण्याची मागणी केली होती. प्रामुख्याने सोनाली यांच्या मुलानेही हीच मागणी केली होती. त्यामुळे आपण आज हा तपास सीबीआयकडे सोपवत असल्याचं मुख्यमंत्र्यांनी जाहीर केलं. केंद्रीय गृहमंत्र्यांना या संदर्भात आपण पत्र लिहिणार असल्याचंही त्यांनी स्पष्ट केलं.

आमचा आमच्या गोवा पोलिसांवर पूर्ण विश्वास आहे. त्यांचा तपासही योग्य दिशेने सुरु आहे. मात्र केवळ लोकांची मागणी असल्यामुळे आपण हा तपास सीबीआयकडे सोपवत असल्याचंही मुख्यमंत्री पुढे म्हणाले आहेत.

उत्तर गोव्यातील हणजुण येथे ड्रग्स पाजून हत्या केलेल्या भाजप नेत्या सोनाली फोगट मृत्यू प्रकरण सीबीआयकडे द्यावे, अशी मागणी करत सर्वजातीय खाप महापंचायतीने हरियाणा सरकारवर दबाव वाढवला आहे. याबाबत तातडीने निर्णय घ्यावा अन्यथा याचा राजकीय परिणाम भोगावे लागेल असा सज्जड दम महापंचायतीने दिला असून याच मागणीसाठी तीव्र विरोध दर्शवत 24 सप्टेंबरनंतर गोवा खंडपीठात याचिका दाखल करण्यात येईल असेही सांगण्यात आले आहे.

दरम्यान सोनाली फोगट हत्या प्रकरणात संशयित सुधीर संगवान आणि सुखविंदर सिंग यांच्या अडचणीत वाढ झाली आहे. दोघांनाही म्हापसा कोर्टाने 13 दिवसांची न्यायालयीन कोठडी दिली आहे. शनिवारी 10 सप्टेंबर रोजी म्हापसा कोर्टात सोनाली फोगट प्रकरणी सुनावणी झाली, त्यावेळी कोर्टाने ही कोठडी वाढवली आहे.