सांगलीत टेम्पो आणि कारचा भीषण अपघात; दोघांचा जागीच मृत्यू

सांगली शहरातील आयर्विन पुलावर भजनी मंडळाचा टेम्पो आणि कारची धडक झाली आहे. या अपघातात 2 जणांचा जागीच मृत्यू झाला आहे, तर 5 ते 7 लोक जखमी झाले आहेत. याचबरोबर 3 जणांची प्रकृती गंभीर आहे, अशी माहिती समोर येत आहे. (tempo and car crash in Sangli two people died on the spot)

जखमींना उपचारासाठी सांगलीच्या शासकीय रुग्णालयात दाखल करण्यात आले आहे. या अपघातात एका वृद्ध महिलेचा मृत्यू झाला आहे, अशी माहिती आहे. अपघाताची माहिती मिळताच पोलिसांनी घटनास्थळी पोहचले.

मिळालेल्या माहितीनुसार, अपघात झालेल्या टेम्पोमधून 12 लोक प्रवास करत होते. ते सर्वजण भजनाच्या कार्यक्रमासाठी शिरोळला जात होते. अपघातात टेम्पो आणि कारच्या दर्शनी भागाचे प्रचंड नुकसान झाले आहे. टेम्पोच्या स्टेअरींगसह दरवाजा आणि इतर भागाचेही मोठे नुकसान झाले आहे. अपघातातील जखमी झालेल्या तिघांची प्रकृती चिंताजनक असल्याची माहिती डॉक्टरांनी (Doctor) दिली आहे.

महाराष्ट्रात (Maharashtra) रस्ते अपघातांची मालिका सुरूच आहे. रस्त्यांची दुरुस्ती आणि वाहतूक नियम कडक करण्याची गरज आहे, असे नागरिकांचे मत आहे.