राज्यसभेसाठी पाठींबा द्या; मराठा क्रांती मोर्चा समन्वयकांनी घेतली शरद पवारांची भेट

राज्यसभेच्या सहाव्या जागेसाठी संभाजीराजे छत्रपती यांनी मोर्चेबांधणी सुरु केली आहे. सक्रियपणे राज्यातील नेत्यांच्या भेटीगाटी घेत आपली ताकद आजमावण्याचा प्रयत्न ही सुरु आहे. या पार्श्वभूमीवर राष्ट्रवादीने आपली भुमिका स्पष्ट केली आहे. मात्र आपल्या वक्तव्याचा चुकीचा अर्थ लावण्यात आला, महाविकास आघाडी नव्हे तर शिवसेनेच्या उमेदवाराला आपला पाठिंबा असल्याचं राष्ट्रवादीचे अध्यक्ष शरद पवार यांनी स्पष्ट केलं तसेच संभाजीराजेंनी शिवसेना पुरस्कृत उमेदवार व्हावं अशी इच्छाही बोलावून दाखवली आहे. ( Support for Rajya Sabha; Maratha Kranti Morcha coordinators met Sharad Pawar )

मराठा क्रांती मोर्च्याच्या समन्वयकांनी शरद पवारांची आज पुण्यामध्ये भेट राज्यसभेच्या सहाव्या जागेसाठी संभाजीराजेंना पाठिंबा द्यावा या मागणीसाठी केली. त्यावेळी शरद पवार म्हणाले की, संभाजीराजे यांनी शिवसेना पुरस्कृत उमेदवार व्हावं अशी इच्छा आहे. शिवसेना पुरस्कृत किंवा शिवसेनेकडून जाहीर करण्यात आलेल्या उमेदवारालाच राष्ट्रवादी पाठींबा देणार. संभाजीराजे यांना राष्ट्रवादीचा पाठींबा असं आपण कधी बोललो नाही, माझ्या नांदेडमधील वक्तव्याचा चुकीचा अर्थ लावला.

संभाजीराजे छत्रपती शिवसेनेच्या वाटेवर ?

मिळालेल्या माहितीनुसार संभाजीराजे छत्रपती उद्या दुपारी 12 वाजता वर्षा बंगल्यावर मुख्यमंत्र्यांना भेटण्यासाठी जाणार असल्याचे वृत्त आहे. त्यामूळे संभाजीराजे शिवसेनेत प्रवेश करण्याची शक्यता असल्याची चर्चा आहे .उद्या दुपारी 12 वाजता संभाजीराजे छत्रपती यांनी अधिकृत पक्षप्रवेश करावं, त्यानंतर त्यांची उमेदवारी जाहीर करण्यात येईल असा निरोप शिवसेनेच्या वतीनं संभाजीराजेंना देण्यात आल्याचं सांगितलं जातय.