पुण्याहून गोव्याकडे जाणारी बस जळून खाक

पुण्याहून (Pune) गोव्याकडे जाणाऱ्या मनिष ट्रॅव्हल्सने आज पहाटे अचानक पेट घेतला यामध्ये ही बसगाडी जळून खाक झाली आहे. ही घटना आज गुरुवारी पहाटे 4 वाजता वैभववाडी एडगांव घाडीवाडी जवळ घडली आहे. या घटनेने वैभववाडी तालुक्यात खळबळ उडाली. या ट्रॅव्हल्समधील 37 प्रवासी सुदैवाने थोडक्यात बचावले. तर एक वयोवृद्ध महिला जखमी झाल्याची माहिती मिळाली आहे. या दुर्घटनेनंतर सर्व प्रवाशांना सुरक्षितस्थळी हलविण्यात आले आहे.

मनिष ट्रॅव्हल्स (नं. जीए 03/डब्लू 2518) ही बस पहाटे पुण्याहून गोव्याच्या (Goa) दिशेने जात होती. करूळ घाट उतरल्यानंतर एडगांव जवळ या बसला अचानक आग लागली. चालकाच्या लक्षात येताच चालकाने बस त्वरीत थांबवली आणि आग विझवण्याचा प्रयत्न केला. यादरम्यान बसमधील प्रवाशांना खाली उतरविण्यात आले. प्रवासी खाली उतरताच बसमधून धुराचे लोळ बाहेर येऊ लागले आणि बसने मोठा पेट घेतला.

या घटनेची माहिती नजीकच्या पोलिस स्टेशनला मिळताच वैभववाडी पोलीस घटनास्थळी दाखल झाले. त्यांनी प्रवाशांची चौकशी केली. यावेळी महामार्ग विभागाचे पोलीसही घटनास्थळी दाखल झाले. काही तासात कुडाळ येथील अग्निशमन दलाच्या जवानांनी येवून आग विझवली. या घटनेनंतर वैभववाडी एडगाव परिसरात वाहनांच्या लांबच लांब रांगा लागल्या होत्या आणि लोकांची गर्दी जमली होती. सकाळी सात वाजता अडकलेली सर्व वाहने मार्गस्थ करण्यात आली. या घटनेचा पुढील तपास वैभववाडी पोलीस करत आहेत.