ईडीची मोठी कारवाई, नवाब मलिकांना अखेर अटक

महाराष्ट्र सरकारचे मंत्री आणि राष्ट्रवादी काँग्रेस पक्षाचे (NCP) नेते नवाब मलिक यांना मनी लॉन्ड्रिंग प्रकरणी अटक करण्यात आली आहे. याप्रकरणी आजच्या चौकशीनंतर त्यांना अटक करण्यात आली आहे. मलिक (Nawab Malik) यांची आज अंमलबजावणी संचालनालयाने चौकशी केली.

मिळालेल्या माहितीनुसार, ईडीचे अधिकारी सकाळी 6 वाजता नवाब मलिक यांच्या निवासस्थानी पोहोचले होते. जिथे त्यांची सुमारे एक तास चौकशी करण्यात आली. घरी चौकशी केल्यानंतर अधिकारी नवाब मलिक यांना सकाळी साडेसातच्या सुमारास ईडी कार्यालयात घेऊन गेले. सकाळी साडेआठ वाजल्यापासून त्यांची ईडी कार्यालयातही चौकशी करण्यात आली.

दरम्यान, अंमलबजावणी संचालनालयाने (ईडी) नवाब मलिक यांना कथित अंडरवर्ल्ड संबंध असलेल्या मालमत्तेप्रकरणी समन्स बजावले होते. आता या प्रकरणी नवाब मलिक यांची चौकशी करण्यात आली. ED ने 15 फेब्रुवारी रोजी मुंबईत छापे टाकले होते. त्यामधून अंडरवर्ल्ड असलेला संबंध, कथित बेकायदेशीर खरेदी आणि मालमत्तांची विक्री, हवाला व्यवहारांसंदर्भात त्यांच्यावर गुन्हा नोंदविण्यात आला होता. त्यानंतर त्यांची चौकशी करण्यात आली.

तसेच, 1993 च्या बॉम्बस्फोटाचा मास्टरमाईंड दाऊद इब्राहिमची (Dawood Ibrahim) दिवंगत बहीण, सलीम कुरेशी उर्फ ​सलीम फ्रूट, भाऊ इक्बाल कासकर आणि छोटा शकीलच्या नातेवाईकासह 10 ठिकाणी तपास यंत्रणेने छापे टाकले होते. आधीच कारागृहात असलेल्या कासकरला गेल्या आठवड्यात एजन्सीने अटक केली होती. पारकरच्या मुलाचीही ईडीने चौकशी केली होती.