MSRTC: ठाण्यात धावत्या एसटी बसला आग, 65 प्रवाशी थोडक्यात बचावले

एसटी महामंडळाच्या धावत्या बसला भीषण आग लागल्याची धक्कादायक घटना समोर आली आहे. ठाण्याहून भिवंडीच्या दिशेनं जात असताना ही घटना घडली. बस चालकाने दाखवलेल्या प्रसंगावधानतेमुळे बसमील 65 प्रवाशांचा जीव वाचला आहे. अग्निशमन दलाच्या गाड्या घटनास्थळी दाखल झाल्या. दरम्यान, संपूर्ण आग विझवण्यात आली आहे.

मिळालेल्या माहितीनुसार, MSRTC बस मंगळवारी सकाळी भिवंडी आगाराची बस ठाणेहून भिवंडीच्या दिशेने जात होती. बसमध्ये चालक आणि वाहक यांच्यासह 65 प्रवाशी प्रवास करीत होते. दरम्यान, दर्ग्यासमोर बसच्या स्टार्टरमध्ये शॉर्टसर्किट होऊन आग लागली. चालक आनंद विठोबा सवारे यांनी प्रसंगावधान दाखवत बस रस्त्याच्या बाजूला घेतली. तसेच प्रवाशांना तात्काळ खाली उतरण्यास सांगितले. काही वेळातच सर्व प्रवाशी बसमधून खाली उतरले.

दरम्यान, तात्काळ अग्निशमन दलाचे जवान आणि आपत्ती व्यवस्थापन कक्षाच्या कर्मचाऱ्यांनी घटनास्थळी धाव घेत आग विझवली. याशिवाय स्थानिक लोकांनी बसमधून प्रवाशांना खाली उतरवत आग विझवण्याचा प्रयत्न केला.