उद्या एमपीएससीची पूर्व परीक्षा; आयोगाने केल्या 'या' सूचना प्रसिद्ध

महाराष्ट्र लोकसेवा आयोगाची दुय्यम सेवा अराजपत्रित 'गट-ब' संयुक्त पूर्व परीक्षा 2021 उद्या शनिवारी दि. 26 फेब्रूवारी रोजी पार पडत आहे. यावेळी राज्यातील तीन लाख 62 हजार 319 परीक्षार्थी (Exam) हि परीक्षा देणार आहेत. राज्यातील 37 जिल्ह्यांत 1098 उपकेंद्रांवर हि परीक्षा घेण्यात येणार असल्याची माहिती राज्य लोकसेवा आयोगाकडून देण्यात आली आहे. (MPSC Preliminary Exam Latest News)

या परीक्षेच्या दोन्ही सत्रांमध्ये वस्तुनिष्ठ बहुपर्यायी अर्थात MCQ पध्दतीची प्रश्नपत्रिका असणार आहे. परीक्षा कक्षात प्रवेश करतेवेळी उमेदवारांकडे आधारकार्ड, मतदान ओळखपत्र, पासपोर्ट, पॅनकार्ड या पैकी कोणतेही एक ओळखपत्र असणे हे अनिवार्य आहे. तसेच प्रवेशपत्र, काळ्या किंवा निळ्या शाईचा पेन, ओळखपत्र, सॅनिटायझर, पाणी बॉटल, या व्यतिरिक्त इतर कोणतेही साहित्य परीक्षा कक्षात घेऊन जाण्यास विद्यार्थ्यांना परवानगी नाही.

परीक्षा कक्षात मोबाईल (Mobile) अथवा इतर कोणतेही दूरसंचार साधन घेऊन जाण्यास परवानगी नाही. परीक्षा उपकेंद्राच्या आवारामध्ये मित्र, नातेवाइक, पालक अथवा अन्य अनधिकृत व्यक्तींना कोणत्याही परिस्थितीत प्रवेश नाही. परीक्षा उपकेंद्रावर उपस्थित राहण्यासाठी उमेदवारांनी शक्यतो सार्वजनिक वाहतूक साधनांचा वापर करावा. खाजगी वाहनांच्या पार्किंगसाठी परीक्षा उपकेंद्रावर कोणतीही व्यवस्था करण्यात येणार नाही.